തിരുവനന്തപുരം : പട്ടികജാതി വിഭാഗങ്ങള്ക്കായി തിരുവനന്തപുരം നഗരസഭ വഴി നല്കിയിരുന്ന ക്ഷേമപദ്ധതികളില് കോടികളുടെ അഴിമതി. പട്ടികജാതി വകുപ്പ് നടത്തിയ ഓഡിറ്റ് റിപ്പോര്ട്ട് പുറത്തുവന്നതോടെയാണ് അഴിമതിയുടെ ചുരുളഴിയുന്നത്. ഒരു ഉദ്യോഗസ്ഥനും താത്കാലിക ജീവനക്കാനും ചേര്ന്ന് ഒരുകോടി നാല് ലക്ഷം രൂപയുടെ ക്രമക്കേടാണ് നടത്തിയിരിക്കുന്നത്.
നിര്ധനരായ പട്ടിക ജാതി വിഭാഗങ്ങള്ക്കുള്ള വിവാഹ ധനസഹായം, മിശ്രവിവാഹ ധനസഹായം, പഠനമുറി നിര്മാണം, ചകിത്സ സഹായം, വെള്ളപ്പൊക്ക സഹായം എന്നിവയ്ക്ക് നല്കിയിരുന്ന പണം ഡെപ്യൂട്ടേഷനിലെത്തിയ എല്ഡി ക്ലര്ക്ക് യു.ആര്. രാഹുലും എസ്സി പ്രൊമോട്ടര്മാരും ചേര്ന്ന് തട്ടിയെടുക്കുകയായിരുന്നു. പോലീസ് നടത്തിയ പ്രാഥമിക അന്വേഷണത്തില് ഇതുവരെ 75 ലക്ഷത്തിന്റെ തട്ടിപ്പ് കണ്ടെത്തിയിട്ടുണ്ട്. ഈ പണം രാഹുലിന്റെ സുഹൃത്തുക്കളുടെ അക്കൗണ്ടിലേക്ക് പണം വകമാറ്റി. ഇത് പിന്നീട് ഇവര് പങ്കിട്ടെടുക്കുകയായിരുന്നു.
അര്ഹതയിലുള്ള ചില അപേക്ഷകരെ പല കാരണങ്ങള് പറഞ്ഞ് രാഹുല് മടക്കി അയച്ച ശേഷം അവരുടെ പേരില് പണം ചില അക്കൗണ്ടുകളിലേക്ക് മാറ്റുകയായിരുന്നു. ഇത്തരത്തില് നിര്ധനരായ 180 അപേക്ഷകരുടെ പണം തട്ടിയെടുത്തുവെന്നാണ് പട്ടികജാതി വകുപ്പ് നടത്തിയ പ്രാഥമിക അന്വേഷണത്തില് കണ്ടെത്തിയത്. ഈ അക്കൗണ്ടുകളുടെ വിവരങ്ങള് അറിയാന് അപേക്ഷകരുയെല്ലാം മൊഴിയെടുക്കേണ്ടിവരുമെന്ന് പൊലീസ് പറയുന്നു. എന്നാല് തട്ടിപ്പിന്റെ വ്യാപ്തി ഇനിയും ഉയരാനാണ് സാധ്യത. ഓഡിറ്റ് റിപ്പോര്ട്ട് കൂടുതല് അന്വേഷണത്തിനായി ജില്ലാ ക്രൈംബ്രാഞ്ചിന് കൈമാറിയിട്ടുണ്ട്.
കേസിലെ മുഖ്യപ്രതി രാഹുല് ഇപ്പോള് റിമാന്ഡിലാണ്. 2016-2020 നവംബര് മാസം വരെ വിവിധ പദ്ധതികള്ക്ക് അപേക്ഷ നല്കിയവരെ കുറിച്ച് പോലീസ് ശേഖരിച്ചിട്ടുണ്ട്. ട്രഷറിയില് നിന്നുള്ള പണമിടപാടിന്റെ രേഖകളും പരിശോധിക്കുന്നുണ്ട്. ഓരോ അപേക്ഷയും പരിശോധിച്ചാലേ 24 അക്കൗണ്ടിന് പുറമേ മറ്റേതെങ്കിലും അക്കൗണ്ടുകളിലേക്ക് പണം വകമാറ്റിയിട്ടുണ്ടോയെന്ന് വ്യക്തമാകൂ.
