സുല്ത്താന് ബത്തേരി: വയനാട്ടിലെ വെള്ളമുണ്ടക്കടുത്ത് തൊണ്ടര്നാട് പെരിഞ്ചേരിമലയില് ആയുധധാരികളായ മാവോവാദികളെത്തി ലഘുലേഖകള് വിതരണം ചെയ്ത സംഭവത്തില് തൊണ്ടര്നാട് പൊലീസ് കേസെടുത്തു. കഴിഞ്ഞ ദിവസം രാത്രി എട്ടുമണിയോടെ പെരിഞ്ചേരിമല ആദിവാസി കോളനിയില് നാലംഗ സായുധ സംഘം എത്തിയെന്നാണ് നാട്ടുകാര് പൊലീസിനെ അറിയിച്ചത് .കേരളം കണ്ട നരഭോജിയായ മുഖ്യമന്ത്രിയാണ് പിണറായി വിജയനെന്നും അദ്ദേഹം മരണത്തിന്റെ വ്യാപാരിയാണെന്നും സംഘം വിതരണം ചെയ്ത നോട്ടീസില് പറയുന്നു. സി.പി.ഐ മാവോയിസ്റ്റ് ബാണാസുര ഏരിയ കമ്മിറ്റിയുടെ പേരിലാണ് പോസ്റ്ററുകള് എഴുതപ്പെട്ടിട്ടുള്ളത്.
രണ്ട് സ്ത്രീകളും, രണ്ട് പുരുഷന്മാരുമടങ്ങുന്ന സംഘം കോളനിയിലെ രണ്ട് വീടുകളില് കയറി മുദ്രാവാക്യം വിളിക്കുകയും ലഘുലേഖകള് വിതരണം ചെയ്യുകയും ചെയ്തു. പരിസരത്തെ ഇലക്ട്രിക് പോസ്റ്റുകളില് പോസ്റ്ററുകള് പതിച്ചതിന് ശേഷമാണ് സംഘം കാട്ടിലേക്ക് മടങ്ങിയത്. മുഖ്യമന്ത്രിക്കും സര്ക്കാരിനുമെതിരെ രൂക്ഷമായ പ്രതികരണമാണ് പോസ്റ്ററുകളില് ഉള്ളത്.
