മുട്ടം: തോട്ടുങ്കര കാക്കൊമ്പില് ഊളാനിയില് (കപ്പയില്) സരോജിനി(75)യെ തീ വെച്ച് കൊലപ്പെടുത്തിയ സംഭവത്തില് മുട്ടം പോലീസ് അറസ്റ്റ് ചെയ്ത വെള്ളത്തൂവല് ശല്യംപാറ വരകില് സുനില് കുമാറി(52) നെ തെളിവെടുപ്പിന് പോലീസ് കസ്റ്റഡിയില് വിട്ട് നല്കി. കഴിഞ്ഞ 23ന് അറസ്റ്റ് ചെയ്ത സുനില് കുമാറിനെ കൊവിഡ് നിരീക്ഷണത്തിനായി പീരുമേട് സബ് ജയിലിലാണ് പാര്പ്പിച്ചിരുന്നത്.
ഫലം നെഗറ്റീവായതിനെ തുടര്ന്ന് ഇന്നലെ മുട്ടം ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കി. ഇതേ തുടര്ന്ന് രണ്ട് ദിവസത്തെ തെളിവെടുപ്പിന് വേണ്ടി കോടതി പോലീസ് കസ്റ്റഡിയില് വിട്ട് കൊടുത്തു. കഴിഞ്ഞ മാര്ച്ച് 31ന് അര്ദ്ധരാത്രിയിലാണ് സരോജിനിയുടെ ബന്ധുവായ സുനില്കുമാര് ക്രൂരമായ കൊലപാതകം നടത്തിയത്.
സുനില്കുമാര് സരോജിനിയെ കൊലപ്പെടുത്താന് പെട്രോള് വാങ്ങിയ മുവാറ്റുപുഴയിലുള്ള പമ്പില് എത്തിച്ച് തെളിവെടുപ്പ് നടത്തിയതിന് ശേഷം പിന്നീട് മുട്ടം ജില്ലാ ജയിലിലേക്ക് മാറ്റി. മുട്ടം സിഐ വി. ശിവകുമാറിന്റെ നേതൃത്വത്തിലുള്ള പോലീസാണ് തെളിവെടുപ്പ് നടത്തിയത്.
