ആലുവ: നെടുമ്പാശേരി വിമാനത്താവളത്തിലെ അന്താരാഷ്ട്ര ടെര്മിനലില് ഷാര്ജയില് നിന്നെത്തിയ താജു തോമസ് എന്നയാളെ ഒരു സംഘം ആളുകള് തട്ടിക്കൊണ്ടുപോയ സംഭവത്തില് ഒരാളെ കൂടി പോലീസ് പിടികൂടി. മലപ്പുറം വള്ളിക്കുന്ന് താഴത്തുവീട്ടില് അഭിലാഷ് (39) നെയാണ് ജില്ലാ പോലീസ് മേധാവി കെ. കാര്ത്തിക്കിന്റെ നേതൃത്വത്തില് പിടികൂടിയത്. ഇതോടെ ഈ കേസില് പിടിയിലാകുന്നവരുടെ എണ്ണം പന്ത്രണ്ടായി. അഭിലാഷാണ് തട്ടിക്കൊണ്ടുപോകാന് ക്വട്ടേഷന് സംഘത്തെ ഏര്പ്പെടുത്തിയതും, അതിനാവശ്യമായ സാമ്പത്തികം സംഘടിപ്പിച്ചതും. സ്വര്ണ്ണക്കടത്തായിരുന്നു സംഭവത്തിന്റെ പിന്നിലെന്നാണ് അന്വേഷണത്തില് നിന്ന് പോലിസിന് ലഭിക്കുന്ന വിവരം.
തട്ടിക്കൊണ്ടുപോയ സംഘത്തിന് ലഭിച്ച തെറ്റായ വിവരത്തെ തുടര്ന്ന് ആളുമാറിയാണ് താജു തോമസിനെ പിടികൂടിയാതെന്നാണ് അന്വേഷണത്തില് നിന്ന് വെളിവാകുന്നത്. ആലുവ ഡിവൈഎസ്പി ടി.എസ്. സിനോജ്, നെടുമ്പാശേരി ഇന്സ്പെക്ടര് ടി. ശശികുമാര്, എഎസ്ഐ ബാലചന്ദ്രന്, സിപിഒമരായ സി.എ യശാന്ത്, രശ്മി എന്നിവരും ഡാന്സാഫ് ടീമും അന്വേഷണ സംഘത്തിലുണ്ടായിരുന്നു. ക്വട്ടേഷന് സംഘത്തിന്റെ പ്രവര്ത്തനങ്ങളെക്കുറിച്ചുള്ള അന്വേഷണം വ്യാപിപ്പിച്ചിട്ടുണ്ടെന്നും കൂടുതല് പേര് ഉടന് അറസ്റ്റിലാകുമെന്നും എസ്പി കാര്ത്തിക്ക് പറഞ്ഞു.
