സെയ്ന്റ് പീറ്റേഴ്സ്ബെര്ഗ്: അപരാജിത കുതിപ്പുമായി ബെല്ജിയം യൂറോ ചാമ്പ്യന്ഷിപ്പിന്റെ പ്രീ ക്വാര്ട്ടറില്. ഗ്രൂപ്പ് ബിയിലെ അവസാന മത്സരത്തില് ഫിന്ലന്ഡിനെ മറുപടിയില്ലാത്ത് രണ്ട് ഗോളുകള്ക്ക് അവര് തകര്ത്തു. കളിച്ച മൂന്ന് മത്സരങ്ങളിലും വിജയിച്ച് ഗ്രൂപ്പ് ചാമ്പ്യന്മാരായാണ് ലോക ഒന്നാം നമ്പര് ടീമായ ബെല്ജിയം പ്രീ ക്വാര്ട്ടറില് പ്രവേശിച്ചത്.
റൊമേലു ലുക്കാക്കു ബെല്ജിയത്തിനായി ഗോള് നേടിയപ്പോള് ഫിന്ലന്ഡ് ഗോള്കീപ്പര് ലൂക്കാസ് ഹ്രാഡെസ്കിയുടെ സെല്ഫ് ഗോളും ചുവന്ന ചെകുത്താന്മാര്ക്ക് തുണയായി. രണ്ടാം പകുതിയിലാണ് രണ്ട് ഗോളുകളും പിറന്നത്. തോറ്റെങ്കിലും ഫിന്ലന്ഡിന്റെ പ്രീക്വാര്ട്ടര് പ്രതീക്ഷകള് അസ്തമിച്ചിട്ടില്ല.
കഴിഞ്ഞ മത്സരത്തില് കളിച്ച ടീമില് നിന്ന് എട്ട് മാറ്റങ്ങളുമായാണ് ബെല്ജിയം ഫിന്ലന്ഡിനെതിരേ കളിക്കാനിറങ്ങിയത്. തുടക്കം മുതല് ബെല്ജിയമാണ് കളി നിയന്ത്രിച്ചത്. കുറിയ പാസുകളുമായി ടീം നിരന്തരം ഫിന്ലന്ഡ് ഗോള്മുഖത്ത് ഭീതിപരത്തിയെങ്കിലും ഗോള് മാത്രം വിട്ടുനിന്നു.
ബെല്ജിയത്തിനൊപ്പം ഫിന്ലന്ഡും ആക്രമണങ്ങള്ക്ക് നേതൃത്വം നല്കി. എന്നാല് ഗോളവസരങ്ങള് സൃഷ്ടിക്കുന്നതില് ടീം പരാജയപ്പെട്ടു. 15-ാം മിനിട്ടില് കെവിന് ഡിബ്രുയിനെയുടെ പാസില് നിന്ന് ബെല്ജിയത്തിന്റെ റൊമേലു ലുക്കാക്കുവിന് മികച്ച അവസരം ലഭിച്ചെങ്കിലും താരത്തിന് ലക്ഷ്യം കാണാന് കഴിഞ്ഞില്ല. 37-ാം മിനിറ്റില് ഹസാര്ഡ് ബോക്സിനകത്തേക്ക് ഉയര്ത്തി നല്കിയ പന്തിന് ലുക്കാക്കു തലവച്ചെങ്കിലും പന്ത് കൃത്യമായി ഗോള്കീപ്പറുടെ കൈകളിലേക്കായിരുന്നു. പിന്നീട് ഡോക്കുവിന്റെ ഗോളെന്നുറച്ച മനോഹരമായ ഒരു ഷോട്ട് ഫിന്ലന്ഡ് ഗോള്കീപ്പര് ഹാര്ഡെസ്കി തട്ടിയകറ്റി. പിന്നാലെ ആദ്യ പകുതി ഗോള്രഹിത സമനിലയില് അവസാനിച്ചു.
രണ്ടാം പകുതിയിലും ബെല്ജിയം ആക്രമണത്തിന് കുറവുണ്ടായിരുന്നില്ല. 55-ാം മിനിട്ടില് ബെല്ജിയത്തിന്റെ ചാര്ഡ്ലിക്ക് മികച്ച അവസരം ലഭിച്ചെങ്കിലും താരത്തിന്റെ ഷോട്ടിന് കരുത്തില്ലായിരുന്നു. 62-ാം മിനിട്ടില് ഫിന്ലന്ഡിന്റെ കമാറ ബെല്ജിയം പോസ്റ്റിലേക്ക് വെടിയുതിര്ത്തെങ്കിലും ഗോള്കീപ്പര് തിബോട് കുര്ടോയിസിനെ കീഴടക്കാനായില്ല. രണ്ട് മിനിറ്റിനു ശേഷം ഗോള്കീപ്പര് മാത്രം മുന്നില് നില്ക്കേ ലഭിച്ച തുറന്ന അവസരം ഹസാര്ഡും പാഴാക്കി.
ഒടുവില് 74-ാം മിനിറ്റില് ബെല്ജിയം ലീഡെടുത്തു. ഫിന്ലന്ഡ് ഗോള്കീപ്പര് ലുക്കാസ് ഹ്രാഡെസ്കിയുടെ സെല്ഫ് ഗോളിലൂടെയാണ് ബെല്ജിയം മുന്നിലെത്തിയത്. കോര്ണര് കിക്കിലൂടെയാണ് ഗോള് പിറന്നത്. ബോക്സിലേക്കുയര്ന്നുവന്ന കോര്ണര് കിക്കില് കൃത്യമായി ബെല്ജിയത്തിന്റെ വെര്മാലെന് തലവെച്ചു. എന്നാല് താരത്തിന്റെ ഹെഡ്ഡര് ഫിന്ലന്ഡ് പോസ്റ്റില് തട്ടിത്തെറിച്ചു. നിര്ഭാഗ്യവശാല് പന്ത് വന്ന് തട്ടിയത് ഗോള്കീപ്പര് ലൂക്കാസ് ഹ്രാഡെസ്കിയുടെ ദേഹത്താണ്. താരത്തിന്റെ ശരീരത്തില് തട്ടി പന്ത് വലയിലെത്തി. ഇത് ലക്ഷപ്പെടുത്താന് ഹ്രാഡെസ്കി ശ്രമിച്ചെങ്കിലും പന്ത് ഗോള്വര കടന്നു.
ലീഡ് വഴങ്ങിയതോടെ ഫിന്ലന്ഡ് പ്രതിരോധത്തിന്റെ കെട്ടുറപ്പ് തകര്ന്നു. പിന്നാലെ 81-ാം മിനിട്ടില് ബെല്ജിയം രണ്ടാം ഗോള് നേടി. ഇത്തവണ റൊമേലു ലുക്കാക്കുവാണ് ഗോള് നേടിയത്. ഡിബ്രുയിന് നല്കിയ പാസ് സ്വീകരിച്ച ലുക്കാക്കു പ്രതിരോധതാരങ്ങളെ കബിളിപ്പിച്ച് പന്ത് പോസ്റ്റിന്റെ വലത്തേ മൂലയിലേക്ക് പായിച്ചു. ഇതോടെ ബെല്ജിയം വിജയമുറപ്പിച്ചു.
ജന്മഭൂമി ഓണ്ലൈന്