വര്‍ക്കല: ശക്തമായ തിരയിൽ വള്ളത്തില്‍ നിന്നും തെറിച്ചുവീണ് മത്സ്യത്തൊഴിലാളി മരിച്ചു. ഓടയം സഹീദ് മന്‍സിലില്‍ ഖസാലിയുടെ മകന്‍ സഹീദ് (41) ആണ് മരണപ്പെട്ടത്. ഇടവ കടപ്പുറത്ത് നിന്നും മത്സ്യബന്ധനത്തിന് പോയ നാലംഗ സംഘത്തിലായിരുന്നു സഹീദ്.
ഇന്ന് പുലര്‍ച്ചെ 4.30യോടെയാണ് ആലിയ എന്ന വള്ളത്തിലാണ് നാലംഗ സംഘം മത്സ്യബന്ധനത്തിന് പോയത്. യാത്രയ്‌ക്കിടെ വള്ളത്തിന്റെ എന്‍ജിന്‍ തകരാറിലായി. തുടര്‍ന്ന് ഇവര്‍ തിരിച്ചു വരാന്‍ ശ്രമിക്കുന്നതിനിടെയുണ്ടായ ശക്തമായ തിരയില്‍ സഹീദ് വള്ളത്തില്‍ നിന്നും തെറിച്ചു വീഴുകയായിരുന്നു.
ഇടവ സ്വദേശികളായ ഷാഹീര്‍ , മന്‍സൂര്‍ , പരവൂര്‍ സ്വദേശിയും സഹീദിന്റെ ഭാര്യ സഹോദരനുമായ നഹാസ് എന്നിവരാണ് വള്ളത്തില്‍ കൂടെ ഉണ്ടായിരുന്നത്. ഇവര്‍ കയറിട്ട് സഹീദിനെ രക്ഷപ്പെടുത്താന്‍ ശ്രമിച്ചെങ്കിലും ഫലം ഉണ്ടായില്ല. രാവിലെ 6.45 ഓടെ ഓടയം പള്ളിക്ക് സമീപമുള്ള കടപ്പുറത്ത് സഹീദിന്റെ മൃതദേഹം അടിയുകയായിരുന്നു. മൃതദേഹം പാരിപ്പള്ളി മെഡിക്കല്‍ കോളേജിലേക്ക് മാറ്റിയിട്ടുണ്ട്.
പ്രതികരിക്കാൻ ഇവിടെ എഴുതുക: