തിരുവനന്തപുരം : രാജ്യവിരുദ്ധ പരാമര്ശം നടത്തിയതിന് രാജ്യദ്രോഹക്കുറ്റം ചുമത്തിയ നടിയും സംവിധായികയുമായ ഐഷ സുല്ത്താനയ്ക്ക് പിന്തുണയുമായി സംസ്ഥാന വിദ്യാഭ്യാസ വകുപ്പ് മന്ത്രി വി. ശിവന്കുട്ടി. ഐഷ സുല്ത്താനയെ ഫോണില് വിളിച്ചാണ് ശിവന്കുട്ടി പിന്തുണ അറിയിച്ചിരിക്കുന്നത്.
ധൈര്യമായി ഇരിക്കണം, എല്ലാവരും കൂടെയുണ്ടെന്നുമാണ് ശിവന്കുട്ടി ഐഷ സുല്ത്താനയെ അനുകൂലിച്ച് അറിയിച്ചത്. കേരളം ലക്ഷദ്വീപ് ജനതയ്ക്കൊപ്പമാണ്. ലോകത്ത് ഒരു രാജ്യത്തും നടക്കാത്ത നടപടിക്രമങ്ങളാണിത്. പോരാട്ടത്തില് തനിച്ചല്ലെന്നും മന്ത്രി ഐഷയെ സുല്ത്താനയെ അറിയിച്ചു.
ചാനല് ചര്ച്ചയ്ക്കിടെ രാജ്യവിരുദ്ധ പ്രസ്താവന നടത്തിയതിന് 124 എ, 153 ബി എന്നീ ദേശവിരുദ്ധ വകുപ്പുകള് ചുമത്തിയാണ് കേസ് എടുത്തിരിക്കുന്നത്. കേന്ദ്രസര്ക്കാര് ലക്ഷദ്വീപില് ജൈവായുധം പ്രയോഗിച്ചുവെന്നായിരുന്നു ഐഷയുടെ പ്രസ്താവന. തുടര്ന്ന് ബിജെപി ലക്ഷദ്വീപ് പ്രസിഡന്റ് സി. അബ്ദുല് ഖാദര് ഹാജിയുടെ പരാതിയുടെ അടിസ്ഥാനത്തില് കവരത്തി പോലീസ് രാജ്യദ്രോഹക്കുറ്റം ചുമത്തി എഫ്ഐആര് രജിസ്റ്റര് ചെയ്യുകയായിരുന്നു. ലക്ഷദ്വീപിലെ ഭരണകൂടത്തിനെതിരേ വ്യാജവാര്ത്തകള് പ്രചരിപ്പിക്കാന് ടൂള്കിറ്റ് ഇവര് തയ്യാറാക്കിയതായും റിപ്പോര്ട്ടുകള് പുറത്തുവന്നിട്ടുണ്ട്.
