കാഞ്ഞാർ: ചക്കിക്കാവിൽ റേഞ്ച് ഇല്ലാത്തത് വിദ്യാർത്ഥികൾക്ക് ദുരിതമാകുന്നു. കുടയത്തൂർ പഞ്ചായത്തിലെ ആറാം വർഡിലെ ചക്കിക്കാവിലെ വിദ്യാർത്ഥികളും രക്ഷിതാക്കളും സ്കൂൾ തുറന്നതു മുതൽ ആശങ്കയിലാണ് . ഒന്നാം ക്ലാസ് മുതൽ ഡിഗ്രിക്ക് വരെ പഠിക്കുന്ന നിരവധി കുട്ടികളാണ് ഫോണിന് റേഞ്ച് ഇല്ലാത്തതുമൂലം ബുദ്ധിമുട്ടുന്നത്. അറിയപ്പെടുന്ന വിനോദസഞ്ചാര കേന്ദ്രമായ ഇലവീഴാപൂഞ്ചിറയുടെ ഭാഗമായ ചക്കിക്കാവിൽ ഓൺലൈൻ പഠനം അന്യമാകുന്നു. ഈ പ്രദേശത്തെ ഏക ആശ്രയം എയർടെല്ലിന്റെ കണക്ഷൻ ആണ് അതും വീടുകളിൽ പലർക്കും ലഭ്യമല്ല.
താമസ സ്ഥലത്ത് നിന്നും പലർക്കും അര കിലോമീറ്റർ വരെ ദൂരെ ഇലവീഴാ പൂഞ്ചിറയുടെ മുകൾ ഭാഗം വരെ പോകേണ്ട അവസ്ഥയാണ് ഉള്ളത്. മഴക്കാലം തുടങ്ങിയാൽ ഈ ഭാഗത്തും നെറ്റ് കിട്ടില്ല. ഇത്രയും ദൂരം കുട്ടികളെ തനിച്ച് വിടുന്നത് അപകടങ്ങൾക്ക് കാരണമാകും എന്ന ഭയത്തിൽ രക്ഷിതാക്കളും കൂടെ പോകേണ്ട ഗതികേടിലാണ് ഇവർ.പഠന സമയം കുട്ടികളുടെ കൂടെ പാറപ്പുറത്ത് പോയി ഇരിക്കേണ്ടതിനാൽ രക്ഷിതാക്കൾക്ക് മറ്റ് ജോലിക്ക് പോകുവാൻ സാധിക്കാതെ വരുന്നു. കാരണം മഴയായികഴിഞ്ഞാൽ പാറകളിലെല്ലാം വഴുക്കൽ ഉണ്ടാകും പലപ്പോഴും ഓൺലൈൻ ക്ലാസുകൾ രാത്രിയിൽ വരുന്നതും കൂടുതൽ ബുദ്ധിമുട്ട് ഉണ്ടാക്കുന്നു .
മഴയത്ത് കുടയും ചൂടി നിന്ന് ക്ലാസുകൾ എഴുതി എടുക്കേണ്ട ഗതികേടിലാണ് വിദ്യാർത്ഥികൾ. കൂടാതെ മഴ തുടങ്ങി കഴിഞ്ഞാൽ ദിവസങ്ങളോളം വൈദ്യുതി ഇല്ലാതെ വരുന്നത് നിത്യസംഭവമാണ്. ഇതൊക്കെ ആരോടാണ് പറയേണ്ടത് ആരാണ് ഇതിനൊരു പരിഹാരം കാണാനും സഹായിക്കാനും ഉള്ളത് എന്ന ചോദ്യമാണ് പ്രദേശ വാസികൾ ഉന്നയിക്കുന്നത് . അടിയന്തിരമായി ഇതിനൊരു പരിഹാരം ഉണ്ടായില്ല എങ്കിൽ പല കുട്ടികളുടേയും പഠനം മുടങ്ങുമെന്ന കാര്യത്തിൽ സംശയം ഇല്ല.
