കോട്ടയം: മണിമലയാറ്റില് ചാടി കാണാതായ വില്ലേജ് ഓഫീസറുടെ മൃതദേഹം കണ്ടെത്തി. ചങ്ങനാശേരി സ്പെഷ്യല് വില്ലേജ് ഓഫീസര് കങ്ങഴ സ്വദേശിയായ എന് പ്രകാശന്റെ മൃതദേഹമാണ് മൂന്നാം ദിവസം കണ്ടെത്തിയത്. ഇന്ന് രാവിലെ ഏഴ് മണിയോടെ മണിമല പാലത്തില് നിന്നും ഒരു കിലോമീറ്ററോളം മാറി മൂങ്ങാനി തടയണയോട് ചേര്ന്നാണ് മൃതദേഹം പൊങ്ങിയത്.
ഇന്ക്വസ്റ്റ് പൂര്ത്തിയാക്കിയ ശേഷം പോസ്റ്റ്മോര്ട്ടത്തിനായി മൃതദേഹം മെഡിക്കല് കോളേജിലേക്ക് കൊണ്ടുപോകും. തിങ്കളാഴ്ച രാവിലെ പത്ത് മണിയോടെയാണ് വലിയ പാലത്തില് നിന്നും പ്രകാശന് മണിമലയാറ്റിലേക്ക് ചാടിയത്. ഇയാള്ക്കായി അഗ്നിരക്ഷാസേനയുടെയും സ്കൂബ ടീം അംഗങ്ങളുടെയും നേതൃത്വത്തില് കഴിഞ്ഞ രണ്ട് ദിവസമായി തിരച്ചില് തുടരുകയായിരുന്നു. ഇതിനിടെയാണ് മൃതദേഹം പൊങ്ങുന്നത്.
ജോയിന്റ് കൗണ്സില് നേതാവ് കൂടിയായ പ്രകാശന്, ജീവനൊടുക്കാന് തീരുമാനിച്ച് തന്നെയാണ് ആറ്റിലേക്ക് ചാടിയതെന്നാണ് പോലീസ് നിഗമനം. എന്നാല് ഇതിനു പിന്നിലെ കാരണം വ്യക്തമല്ല.
