വീടിന്റെ തട്ട് പൊളിക്കുന്നതിനിടെ കോൺക്രീറ്റ് പാളി ഇടിഞ്ഞുവീണ് തൊഴിലാളി മരിച്ചു; കോൺക്രീറ്റ് ഉറയ്‌ക്കുന്നതിന് മുൻപ് തട്ട് പൊളിച്ചത് അപകടത്തിനിടയാക്കി

പത്തനംതിട്ട: കോന്നിയിൽ നിർമ്മാണത്തിലിരുന്ന വീടിന്റെ കോൺക്രീറ്റ് പാളി ഇടിഞ്ഞുവീണ് തൊഴിലാളി മരിച്ചു.  കോന്നി സ്വദേശിയായ സുനിൽകുമാർ എന്ന് വിളിക്കപ്പെടുന്ന അതുൽ കൃഷ്ണയാണ് മരിച്ചത്. നിർമാണത്തിലിരിക്കുന്ന വീടിന്റെ തട്ട് പൊളിക്കുന്നതിനിടെയാണ് അപകടം നടന്നത്.   വീടിന്റെ രണ്ടാം നിലയുടെ പണിയാണ് നടന്നുകൊണ്ടിരുന്നത്.  

കഴിഞ്ഞ ദിവസമാണ് വീടിന്റെ കോൺക്രീറ്റ് വർക്ക് നടന്നത്. ഇതിനായി നിർമ്മിച്ച തട്ട് പൊളിക്കുകയായിരുന്നു തൊഴിലാളികൾ. ഇന്ന് രാവിലെയാണ് തട്ട് പൊളിക്കാൻ ആരംഭിച്ചത്. തട്ട് പൊളിക്കുന്നതിനിടെ ഭിത്തിയുടെയും കോൺക്രീറ്റിന്റെയും ഇടയിൽ അതുൽ കൃഷ്ണ കുടുങ്ങിപ്പോവുകയായിരുന്നു. സംഭവ സ്ഥലത്ത് തന്നെ അതുൽ മരിച്ചു.  

കോൺക്രീറ്റ് ഉറയ്‌ക്കുന്നതിന് മുൻപ് തട്ട് പൊളിച്ചതാവും അപകടത്തിന് കാരണമെന്നാണ് കരുതുന്നത്. ഒപ്പമുണ്ടായിരുന്ന തൊഴിലാളികളിലാർക്കും പരിക്കേറ്റിട്ടില്ല. അപകടം നടന്ന വീടിന് തൊട്ടടുത്താണ് അതുലിന്റെയും വീട്.