ഇരിട്ടി: കര്ണ്ണാടകത്തില് നിന്നും മാക്കൂട്ടം ചുരം വഴിയുള്ള മദ്യക്കടത്ത് തുടരുന്നു. കഴിഞ്ഞ ദിവസങ്ങളില് ഇരിട്ടി പോലീസാണ് വാഹനപരിശോധനക്കിടെ മദ്യം പിടികൂടിയിരുന്നതെങ്കില് ഇന്നലെ പുലര്ച്ചെ കിളിയന്തറ എക്സൈസ് സംഘമാണ് മദ്യം പിടികൂടിയത്.
ബംഗളൂരുവില് മീന് ഇറക്കി തിരിച്ചു വരികയായിരുന്ന വാഹനത്തില് നിന്നുമാണ് 186 ലിറ്റര് മദ്യം പിടികൂടിയത്. ഇതുമായി ബന്ധപ്പെട്ട് തലശ്ശേരി വടക്കുമ്പാട് സ്വദേശി പരിയാട്ട് വീട്ടില് ആശിഫ് (25)നെ എക്സൈസ് സംഘം അറസ്റ്റ് ചെയ്തു. കേരളത്തിലെ ലോക്ഡൗണ് സാഹചര്യം മുതലെടുത്ത് വന്ലാഭം ലക്ഷ്യമിട്ടാണ് മദ്യം കടത്തിയതെന്ന് പ്രതി പറഞ്ഞു.
ചൊവ്വാഴ്ച പച്ചക്കറി വണ്ടിയില് കടത്തുകയായിരുന്ന 230 ലിറ്റര് മദ്യം ഇരിട്ടി പോലീസ് പിടികൂടിയിരുന്നു. കഴിഞ്ഞ മൂന്നാഴ്ചക്കിടെ 900 ലിറ്റര് മദ്യമാണ് പിടികൂടിയത്. ബുധനാഴ്ചയോടെ ഇത് 1086 ലിറ്റര് ആയി ഉയര്ന്നു. എക്സൈസ് ഇന്സ്പെക്ടര് കെ.എ. അനീഷ്, പ്രിവന്റീവ് ഓഫീസര് ഷനില്കുമാര്, സിവില് എക്സൈസ് ഓഫീസര്മാരായ സി.വി. റിജുന്, പി.ജി. അഖില്, റിനീഷ് ഓര്ക്കാട്ടേരി, എക്സൈസ് ഡ്രൈവര് എം. സോള്ദേവ് എന്നിവരാണ് മദ്യം പിടികൂടിയ എക്സൈസ് സംഘത്തില് ഉണ്ടായിരുന്നത്. പ്രതിയെ മട്ടന്നൂര് കോടതിയില് ഹാജരാക്കി റിമാന്ഡ് ചെയ്തു.
