ഹൈക്കോടതി വിധി ബിജെപി നിലപാടിനുള്ള അംഗീകാരം; ന്യൂനപക്ഷ ക്ഷേമ പദ്ധതികളിലെ വിവേചനപരമായ അനുപാതം റദ്ദാക്കിയത് സ്വാഗതം ചെയ്യുന്നുവെന്ന് ജോര്‍ജ്ജ് കുര്യന്‍

തിരുവനന്തപുരം: സംസ്ഥാനത്തെ ന്യൂനപക്ഷ ക്ഷേമ പദ്ധതികളും ആനുകൂല്യങ്ങളും 80:20 അനുപാതത്തില്‍ വിതരണം ചെയ്യുന്നത് അനുവദിച്ചുള്ള ഉത്തരവ് ഹൈക്കോടതി റദ്ദാക്കിയതിനെ സ്വാഗതം ചെയ്യുന്നതായി ബിജെപി സംസ്ഥാന ജനറല്‍ സെക്രട്ടറി ജോര്‍ജ്ജ് കുര്യന്‍. ബിജെപി നിലപാടിനുള്ള അംഗീകാരം കൂടിയാണീ ഉത്തരവെന്ന് അദ്ദേഹം വ്യക്തമാക്കി.  

വിവിധ ന്യൂനപക്ഷ വിഭാഗങ്ങളുടെ ജനസംഖ്യാനുപാതികമായി ആനുകൂല്യങ്ങള്‍ അനുവദിക്കണമെന്നതായിരുന്നു ബിജെപി നിലപാട്. ഇപ്പോള്‍ ഹൈക്കോടതിയും അതംഗീകരിച്ചിരിക്കുകയാണ്. 80 ശതമാനം മുസ്ലിം വിഭാഗത്തിനും 20ശതമാനം ഇതര ന്യൂനപക്ഷ വിഭാഗങ്ങള്‍ക്കും എന്നതായിരുന്നു 2015ല്‍ സര്‍ക്കാര്‍ ഇറക്കിയ ഉത്തരവ്.  

ഒട്ടും നീതീകരിക്കാവുന്ന നിലപാടായിരുന്നില്ല ഇത്. ന്യൂനപക്ഷ ക്ഷേമത്തിനായുള്ള സഹായങ്ങളും പദ്ധതികളും ചിലര്‍മാത്രം കൈക്കലാക്കുകയാണെന്ന ആക്ഷേപവും നിലനില്‍ക്കുന്ന സാഹചര്യത്തില്‍ ഹൈക്കോടതി വിധി ഏറെ പ്രസക്തമാണെന്ന് ജോര്‍ജ്ജ്കുര്യന്‍ പറഞ്ഞു.  പൊതുപദ്ധതികളില്‍ 80 ശതമാനം വിഹിതം മുസ്ലിം സമുദായത്തിനും ബാക്കി 20ശതമാനം ക്രിസ്ത്യന്‍, ബുദ്ധ, സിഖ്, ജൈന, പാര്‍സി എന്നീ 5 ന്യൂനപക്ഷ വിഭാഗങ്ങള്‍ക്കുമായി മാറ്റിവച്ചുകൊണ്ടുള്ള ഉത്തരവ് റദ്ദാക്കിയ വിധിയിലൂടെ സര്‍ക്കാരിന്റെ ചിലരോടുള്ള വിവേചനനയത്തിന് തിരിച്ചടിയുണ്ടായെന്നും അദ്ദേഹം പറഞ്ഞു. അച്യുതാനന്ദന്‍ സര്‍ക്കാര്‍ നടപ്പാക്കുകയും, ഉമ്മന്‍ ചാണ്ടി സര്‍ക്കാര്‍ ശരിവയ്‌ക്കുകയും പിണറായി സര്‍ക്കാര്‍ തുടരുകയും ചെയ്ത തെറ്റായ നയമാണ് ഇപ്പോള്‍ ഹൈക്കോടതി റദ്ദാക്കിയതെന്നും അദേഹം പറഞ്ഞു.