ആലപ്പുഴ: തുറവൂരില്‍ സുഹൃത്തുക്കളായ രണ്ട് പേരെ വീടുകളില്‍ മരിച്ച നിലയില്‍ കണ്ടെത്തി. തുറവൂര്‍ ചാവടി സ്വദേശികളായ ബൈജു(50),സ്‌റ്റീഫന്‍(46) എന്നിവരെയാണ് അവരുടെ വീടുകളില്‍ ദുരൂഹസാഹചര്യത്തില്‍ മരിച്ചനിലയില്‍ കണ്ടത്. മദ്യത്തിന് പകരം സാനിറ്റൈസർ കുടിച്ചതിനാലാണ് ഇരുവരും മരിച്ചതെന്നാണ് സംശയം. എന്നാൽ, ഇക്കാര്യം പോലീസ് സ്ഥിരീകരിച്ചിട്ടില്ല.
ഇന്നലെ രാത്രി ഇരുവരും ബൈജുവിന്റെ വീട്ടില്‍ ഒത്തുകൂടി മദ്യപിച്ചിരുന്നതായാണ് പോലീസ് പറയുന്നത്. ഇതിന് ശേഷം രണ്ടുപേരും വീടുകളിലേക്ക് പോയി. രാവിലെ ഏഴ് മണിയോടെ ബൈജുവിനെ വീട്ടിനുള‌ളില്‍ മരിച്ചനിലയില്‍ കണ്ടെത്തി. സ്‌റ്റീഫനെ കാണാത്തതിനെ തുടര്‍ന്ന് അന്വേഷിച്ചെത്തിയ സുഹൃത്തുക്കള്‍ ഇയാളെയും മരിച്ച നിലയില്‍ കണ്ടെത്തുകയായിരുന്നു. തുടര്‍ന്ന് അന്വേഷണത്തില്‍ വാ‌റ്റ് ചാരായത്തിന്റെയും സാനി‌റ്റൈസറിന്റെയും ഒഴിഞ്ഞ കുപ്പികള്‍ സ്ഥലത്ത് നിന്നും കിട്ടിയതായി പോലീസ് അറിയിച്ചു.
മദ്യം കുറച്ചുമാത്രം ഉണ്ടായിരുന്നതിനാല്‍ വീര്യം കൂടിയ വാ‌റ്റ് ചാരായമോ സാനി‌റ്റൈസറോ മദ്യത്തിനൊപ്പം കഴിച്ചിരിക്കാമെന്നാണ് പോലീസ് കണക്കാക്കുന്നത്. ബൈജുവിന്റെയും സ്‌റ്റീഫന്റെയും മൃതദേഹങ്ങള്‍ പോസ്‌റ്റ്മോര്‍ട്ടത്തിനായി തുറവൂര്‍ താലൂക്ക് ആശുപത്രിയിലേക്ക് മാ‌റ്റിയെന്ന് കേസ് അന്വേഷിക്കുന്ന കുത്തിയതോട് പോലീസ് അറിയിച്ചു.
പ്രതികരിക്കാൻ ഇവിടെ എഴുതുക: