കോവിഡ് കാല പ്രതിസന്ധികള് നേരിടുന്ന കുടുംബത്തിന്റെ കഥയയുമായി ആര്ക്കറിയാം. ഛായാഗ്രാഹകന് സാനു ജോണ് വര്ഗീസാണ് ചിത്രത്തിന്റെ സംവിധാനം നിര്വഹിക്കുന്നത്. പാര്വതി തിരുവോത്ത്, ഷറഫുദ്ദീന്, ബിജു മേനോന് എന്നിവര് മുഖ്യ കഥാപാത്രങ്ങളായെത്തുന്ന ചിത്രം മെയ് 19 ന് റൂട്സിലൂടെ റിലീസ് ചെയ്യുന്നു.
99 രൂപയ്ക്കാണ് റൂട്സിലൂടെ പ്രേക്ഷകരിലേക്ക് സിനിമ എത്തുന്നത്. തീയേറ്ററില് റിലീസ് ചെയ്തിരുന്നുവെങ്കിലും ലോക്ക്ഡൗണ് കാരണം അധികം പ്രേക്ഷകര്ക്ക് കാണാന് കഴിഞ്ഞില്ല. തീയേറ്റര് അനുഭവം നഷ്ടപ്പെട്ടവര്ക്ക് ദൃശ്യവിസ്മയം ഒരുക്കാനാണ് റൂട്സിലൂടെ പ്രവര്ത്തകര് ശ്രമിക്കുന്നത്.
അല്പം നിഗൂഢത നിറഞ്ഞ 72 വയസ്സുള്ള ഇട്ടിയവിരയുടെ വേഷം കൈകാര്യം ചെയ്യുന്ന ബിജു മേനോന്റെ മേക്കോവര് ആദ്യം തന്നെ പ്രേക്ഷകശ്രദ്ധ നേടിയിരുന്നു. മൂണ്ഷോട്ട് എന്റര്ടെയ്ന്മെന്സിന്റേയും ഒപിഎം സിനിമാസിന്റേയും ബാനറുകളില് സന്തോഷ് ടി. കുരുവിളയും ആഷിഖ് അബുവും ചേര്ന്നാണ് ചിത്രത്തിന്റെ നിര്മാണം.
മഹേഷ് നാരായണന് എഡിറ്റിങ് നിര്വ്വഹിച്ചിരിക്കുന്ന ചിത്രത്തിന്റെ തിരക്കഥ രചിച്ചത് സാനു ജോണ് വര്ഗീസ്, രാജേഷ് രവി, അരുണ് ജനാര്ദ്ദനന് എന്നിവര് ചേര്ന്നാണ്. ജി ശ്രീനിവാസ് റെഡ്ഢിയാണ് ഛായാഗ്രഹണം. നേഹ നായരുടെയും യെക്സാന് ഗാരിപെരേരയുടെയുമാണ് ഗാനങ്ങള്.
