ചാത്തന്നൂര്: രാഷ്ട്രീയ സ്വയം സേവക സംഘം കല്ലുവാതുക്കല് മണ്ഡല് കാര്യവാഹായിരുന്ന അനീഷിന്റെയും ഭാര്യയായ ശ്രീരാമപുരം ബാലഗോകുലത്തിന്റെ ഭാഗിനി പ്രമുഖുമായ അവിതയുടെയും ചരമവാര്ഷിക ദിനമായ ഇന്നലെ ശ്രീരാമപുരത്തും കല്ലുവാതുക്കല് പഞ്ചായത്തിന്റെ വിവിധ ഭാഗങ്ങളിലും നിരവധി സേവാപ്രവര്ത്തനങ്ങളും അനുസ്മരണയോഗങ്ങളും നടന്നു. യോഗാധ്യാപകരായ അനീഷും അവിതയും യോഗ പഠിപ്പിക്കുന്നതിന് വേണ്ടി ബൈക്കില് കൊല്ലത്തേക്കുള്ള യാത്രയ്ക്കിടെ കൊട്ടിയത്ത് വച്ച് ഉണ്ടായ വാഹനാപകടത്തിലാണ് മരിച്ചത്.
അനീഷിന്റെയും അവിതയുടെയും ചരമവാര്ഷിക ദിനമായ ഇന്നലെ കല്ലുവാതുക്കല് ശ്രീരാമപുരം കേന്ദ്രമായി പ്രവര്ത്തിക്കുന്ന അനീഷ്-അവിത സ്മാരക സേവാസമിതിയുടെയും സേവാഭാരതിയുടെയും സംയുക്താഭിമുഖ്യത്തില് വിവിധ പരിപാടികളാണ് നടന്നത്.
രാവിലെ ഇരുവരും അന്തിയുറങ്ങുന്ന സ്ഥലത്ത് മകള് കൃഷ്ണഭദ്ര ദീപം കൊളുത്തി തുടര്ന്ന് സംഘപരിവാര് പ്രവര്ത്തകര് പുഷ്പാർച്ചന നടത്തി. പാരിപ്പള്ളി മെഡിക്കല് കോളേജില് നടന്ന രക്തദാന ചടങ്ങ് കല്ലുവാതുക്കല് പഞ്ചായത്ത് പ്രസിഡന്റ് എസ്. സുദീപ രക്തംദാനം നല്കി ഉദ്ഘാടനം ചെയ്തു. പഞ്ചായത്ത് വൈസ്പ്രസിഡന്റ് എസ്. സത്യപണ്ടാലന്, ബ്ലോക്ക് പഞ്ചായത്ത് അംഗം രോഹിണി, പഞ്ചായത്ത് സ്റ്റാന്റിങ്ങ് കമ്മിറ്റി ചെയര്പേഴ്സണ് രജിതാകുമാരി എന്നിവര് സംസാരിച്ചു. നിരവധി സേവാഭാരതി പ്രവര്ത്തകര് രക്തദാനത്തില് പങ്കാളികളായി തുടര്ന്ന് തുടര്ന്ന് കൊവിഡ് മാനദണ്ഡങ്ങള് പാലിച്ചു നടന്ന അനുസ്മരണസമ്മേളനവും അന്നദാനവും നടന്നു.
