തിരുവനന്തപുരം : സംസ്ഥാനത്തെ സ്വകാര്യ ആശുപത്രികള് ഇനി മുതല് വാക്സിന് നിര്മാതാക്കളില് നിന്നും നേരിട്ട് വാങ്ങണമെന്ന് ആരോഗ്യ വകുപ്പ് മന്ത്രി കെ.കെ. ശൈലജ. നിലവില് സര്ക്കാരില് നിന്നും വാങ്ങിയിട്ടുള്ള വാക്സിന്റെ ബാക്കി ഉണ്ടെങ്കില് അടുത്ത മാസം മുതല് 45 വയസ്സിന് മുകളില് പ്രായമുള്ളവര്ക്ക് 250 രൂപ നിരക്കില് വിതരണം ചെയ്യണമെന്നും ആരോഗ്യവകുപ്പ് മന്ത്രി അറിയിച്ചു.
മെയ് ഒന്നു മുതല് പുതുക്കിയ വാക്സിനേഷന് നയം നടപ്പിലാക്കപ്പെടുന്നതിന്റെ പശ്ചാത്തലത്തിലാണ് പതിയ നിര്ദ്ദേശങ്ങള് മുന്നോട്ട് വെച്ചിരിക്കുന്നത്. സ്വകാര്യ കേന്ദ്രങ്ങളില് ഇപ്പോള് സര്ക്കാരില് നിന്നും ലഭ്യമായിട്ടുള്ള വാക്സിന് ഏപ്രില് 30ന് മുമ്പായി ഉപയോഗിക്കണം. ബാക്കിയുണ്ടെങ്കില് മെയ് ഒന്നു മുതല് 45 വയസിന് മുകളില് പ്രായമുള്ളവര്ക്ക് മാത്രമായി 250 രൂപ നിരക്കില് നല്കണം. മെയ് ഒന്ന് മുതല് 18 വയസ്സിന് മുകളില് പ്രായമുള്ള എല്ലാവര്ക്കും വാക്സിന് എടുക്കാമെങ്കിലും രണ്ടാം ഡോസ് എടുക്കുന്നവര്ക്ക് ആയിരിക്കണം മുന്ഗണന നല്കേണ്ടത്.
വാക്സിനേഷന് സെന്ററുകളില് സെഷന് ഷെഡ്യൂള് ചെയ്യുമ്പോള് രണ്ടാമത്തെ ഡോസ് എടുക്കുന്നവര്ക്ക് മുന്ഗണന നല്കും. അവര്ക്ക് മുന്ഗണന നല്കിയതിന് ശേഷം മാത്രമേ ഓണ്ലൈന് ബുക്കിങ്ങിനായി ആദ്യ ഡോസുകാര്ക്ക് സ്ലോട്ട് അനുവദിക്കൂ.
രണ്ടാം ഡോസ് കോവിഷീല്ഡ് വാക്സീന് 6 മുതല് 8 ആഴ്ചയ്ക്കുള്ളിലും കോവാക്സീന് 4 മുതല് 6 ആഴ്ചയ്ക്കുള്ളിലുമാണ് എടുക്കേണ്ടത്. ഓരോ വാക്സീനേഷന് സെന്ററുകളിലും രണ്ടാമത്തെ ഡോസ് വാക്സീന് എടുക്കുവാന് അര്ഹതയുള്ളവരുടെ ലിസ്റ്റ് കോവിന് പോര്ട്ടലില് ലഭ്യമാകും. ഇതനുസരിച്ച് വാക്സിനേഷന് സെന്ററുകളിലെ മാനേജര്മാര് ആശ പ്രവര്ത്തകരുടെയും തദ്ദേശ ഭരണ സ്ഥാപനങ്ങളുടെയും സഹായത്തോടെ ഇവരെ അറിയിക്കുന്നതാണെന്നും മന്ത്രി വ്യക്തമാക്കി.
സ്പോട്ട് രജിസ്ട്രേഷന് സൗകര്യം ലഭ്യമാക്കുന്നത് വാക്സിനേഷന് കേന്ദ്രങ്ങളില് തിരക്ക് ഉണ്ടാക്കുമെന്നതിനാല് രണ്ടാമത്തെ ഡോസ് എടുക്കാനുള്ളവര്ക്ക് മുന്കൂട്ടി തീയതിയും സമയവും നിശ്ചയിച്ച് അനുവദിക്കുന്നതാണ്. ആ സമയത്ത് മാത്രമേ വാക്സീനേഷനായി കേന്ദ്രത്തില് എത്താന് പാടുള്ളൂ. വാക്സിനേഷന് കേന്ദ്രങ്ങളില് കോവിഡ് പ്രതിരോധം ഉറപ്പാക്കുവാനുള്ള നടപടികള് സ്വീകരിക്കുമെന്നും മന്ത്രി കൂട്ടിച്ചേര്ത്തു.
