ബംഗളൂരു: കോവിഡ് വ്യാപനം കൂടുന്നതിനിടെ രണ്ടാഴ്ചത്തേക്ക് കര്ശന നിയന്ത്രണങ്ങള് പ്രഖ്യാപിച്ച് കര്ണാടക സര്ക്കാര്. മന്ത്രിസഭാ യോഗത്തിനുശേഷം മുഖ്യമന്ത്രി ബി എസ് യദ്യൂരപ്പയാണ് തീരുമാനം അറിയിച്ചത്. കോവിഡ് കേസുകള് ഉയര്ന്നു നില്ക്കുന്ന പത്തു സംസ്ഥാനങ്ങളിലൊന്ന് കര്ണാടകയാണ്. ഞായറാഴ്ച ഇവിടെ 29,438 പ്രതിദിന കേസുകള് റിപ്പോര്ട്ട് ചെയ്തു. വാരാന്ത്യങ്ങളില് കണ്ടിട്ടുള്ളതുപോലെ കര്ഫ്യൂ നിലവിലുണ്ടാകുമെന്നും പൊതുഗതാഗതം അനുവദിക്കില്ലെന്നും മുഖ്യമന്ത്രി പറഞ്ഞു.
നാളെ രാത്രി ഒന്പതു മുതല് മെയ് ഒന്പതു വരെയായിരിക്കും നിയന്ത്രണങ്ങള്. രോഗവ്യാപനം മഹാരാഷ്ട്രായേക്കാളും ദല്ഹിയേക്കാളും രൂക്ഷമാണ്. 18 വയസിന് മുകളിലുള്ള എല്ലാവര്ക്കും സര്ക്കാര് ആശുപത്രികളിലൂടെ സൗജന്യവാക്സിനേഷന് നടത്തുമെന്നും അദ്ദേഹം അറിയിച്ചു. 14 ദിവസത്തേക്ക് തുടരുന്ന നിയന്ത്രണങ്ങള്ക്കിടെ, രാവിലെ ആറു മുതല് പത്തുവരെ ആവശ്യ വസ്തുക്കള് വാങ്ങാന് ഇളവുണ്ടാകും. വസ്ത്ര, നിര്മാണ, കാര്ഷികമേഖലകള് ഒഴികെയുള്ള ഉത്പാദന മേഖലകള് തുറന്നുപ്രവര്ത്തിക്കും.
