തച്ചമ്പാറ: മാച്ചാന്തോട് സ്വദേശി ഉബൈദുള്ളയുടെ തൊടിയില് നിന്നും ലഭിച്ച നിലമാങ്ങ കൗതുകമായി. തൊടിയിലെ ചിതല്പ്പുറ്റ് കിളച്ചപ്പോഴാണ് നിലമാങ്ങ ലഭിച്ചത്. വളരെ അപൂര്വമായി മാത്രം കാണുന്ന അമൂല്യമായ ഔഷധക്കൂണാണിത്. ഞെട്ടുള്ള മാങ്ങയെപ്പോലിരിക്കുന്നതുകൊണ്ടാണ് ഇതിന് നിലമാങ്ങയെന്ന പേരുവന്നത്.
സ്ക്ലറോട്ടിയം സ്റ്റിപിറ്റാറ്റം എന്നാണ് ചിതല്ക്കിഴങ്ങ് എന്ന പേരുള്ള നിലമാങ്ങയുടെ ശാസ്ത്രനാമം. പഴയ കെട്ടിടാവശിഷ്ടങ്ങളിലും ചിതല് പുറ്റുകളിലും വളരുന്ന നിലമാങ്ങ പാല്ച്ചിതലിന്റെ ഇഷ്ടഭക്ഷണമാണ്.
വയനാട്ടിലെ സ്വാമി നാഥന് ഫൗണ്ടേഷന് പുറത്തിറക്കിയ ‘ഔഷധ കൂണുകള്’ എന്ന പുസ്തകത്തില് ഇതിനെ പറ്റി വിശദമായി പറയുന്നുണ്. മിഥുനം, കര്ക്കടകം മാസങ്ങളില് മണ്ണിനടിയില് നിന്ന് കറുത്തപൊടികളോട് കൂടിയ നാരുകള് പൊന്തി വരാറുണ്ട്. ഇത് നിലമാങ്ങയില് നിന്ന് വരുന്നതാണ്.
കോളറ പടര്ന്നുപിടിച്ച കാലത്ത് ഇത് മരുന്നായി നല്കിയിരുന്നു. ഇത് ചതച്ചിട്ട് വെളിച്ചെണ്ണ കാച്ചി ചെവിയില് ഒഴിച്ചാല് ചെവിവേദനക്ക് ഉടനെ ആശ്വാസം ലഭിക്കും. ചുമ, മഞ്ഞപ്പിത്തം, വയറുവേദന, നേത്രരോഗങ്ങള്, ഛര്ദ്ദി, ശരീരവേദന എന്നിവക്കെല്ലാമുള്ള ഔഷധമാണ്.
പട്ടാമ്പി ഓങ്ങല്ലൂരിലുള്ള പേരാമംഗലൂര് മനയില് നിലമാങ്ങ ഉണക്കി സൂക്ഷിച്ചിട്ടുണ്ട്. ഇവിടുത്തെ ഭദ്രകാളിക്ഷേത്രം പുതുക്കി പണിയാന് തറ കീറിയപ്പോഴാണ് ഇവ കണ്ടെത്തിയത്. അപൂര്വ വസ്തുവായതിനാല് സൂക്ഷിച്ചുവച്ചു. രാസവളം, കീടനാശിനി എന്നിവയുടെ പ്രയോഗത്താല് മണ്ണു നശിച്ചതാണ് നിലമാങ്ങകള് നാമാവശേഷമാകാന് കാരണം.
അത്യപൂര്വ്വ വസ്തുവായതിനാല് ഇത് തച്ചമ്പാറ ഇക്കോ ഷോപ്പില് സൂക്ഷിക്കാനാണ് തീരുമാനം.
