അഞ്ചല് (കൊല്ലം): അഞ്ചലില് ദൃശ്യം മോഡല് കൊലപാതകം.ഏരൂര് ഭാരതീപുരത്ത് രണ്ട് വര്ഷങ്ങള്ക്ക് മുന്പ് കാണാതായ ഷാജിയെ (45) സഹോദരന് കൊന്ന് മുറ്റത്ത് കുഴിച്ചിട്ടതാണെന്ന് വെളിപ്പെടുത്തല്. ഭാരതീപുരം പഴയേരൂര് പള്ളിമേലതില് പൊന്നമ്മയുടെ മൂത്തമകന് ഷാജിയെയാണ് രണ്ട് വര്ഷം മുന്പ് കാണാതായത്. എന്നാല് ഷാജിയെ കാണാതായതില് ആരും പരാതിയൊന്നും നല്കിയിരുന്നില്ല. മലപ്പുറത്ത് ജോലിയാണെന്നാണ് വീട്ടുകാര് അയല്ക്കാരോട് പറഞ്ഞിരുന്നത്.
ഇതിനിടയില് പൊന്നമ്മയുടെ സഹോദരിയുടെ മകനായ പത്തനംതിട്ട സ്വദേശി റോയിയോട് പൊന്നമ്മ സംഭവം വെളിപ്പെടുത്തിയിരുന്നു. ഇതുപയോഗിച്ച് റോയി പൊന്നമ്മയുടെ ഇളയ മകനായ സജിനെയും ഭാര്യയെയും ചൂഷണം ചെയ്യുകയായിരുന്നു. നാടകീയമായാണ് കഴിഞ്ഞദിവസം പത്തനംതിട്ട ഡിവൈഎസ്പി ഓഫീസിലെത്തി കൊലപാതക വിവരം കൈമാറിയത്.
നാട്ടില് വല്ലപ്പോഴും മാത്രമെത്തുന്ന ഷാജി അവിവാഹിതനായിരുന്നു. മദ്യപിച്ച് വീട്ടിലെത്തിയ ഷാജി അനുജനുമായുണ്ടായ കയ്യാങ്കളിയില് മരണപ്പെട്ടതായാണ് വിവരം. കൊലപാതകത്തിന് ശേഷം മൃതദേഹം പൊന്നമ്മയും മകന് സജിനും മരുമകളും ചേര്ന്ന് മുറ്റത്ത് കുഴിച്ചിട്ടു. സജിനും അമ്മ പൊന്നമ്മയും ഏരൂര് പോലീസ് കസ്റ്റഡിയിലാണ്. മൃതദേഹം ഇന്ന് ഫോറന്സിക് വിദഗ്ധരുടെ നേതൃത്വത്തില് പുറത്തെടുത്ത് പരിശോധിക്കും.
ജന്മഭൂമി ഓണ്ലൈന്