ശ്രീനഗര്: ജമ്മു കാശ്മീരിലെ സോന്വാര് പ്രദേശത്ത് ഭീകരര് മകനെ കൊലപ്പെടുത്തി രണ്ടുമാസത്തിനുശേഷം, പ്രമുഖ ഹോട്ടല് ശൃംഖലയായ കൃഷ്ണധാബയുടെ ഉടമസ്ഥന് ചൊവ്വാഴ്ച കച്ചവടം പനരാരംഭിച്ചു. സുരക്ഷിതത്വം അനുഭവപ്പെടുന്നുണ്ടെന്നും കാശ്മീര് വീടാണെന്നും ഹോട്ടല് ഉടമ രമേശ് കുമാര് വാര്ത്താ ഏജന്സികളോട് പ്രതികരിച്ചു. ‘ജനിച്ചതും ജീവിതകാലം മുഴുവന് ജീവിച്ചതും ഇവിടെയാണ്. ഞങ്ങള് മറ്റെവിടെ പോകും’- അദ്ദേഹം പറഞ്ഞു.
വെജിറ്റേറിയന് ഭക്ഷണപ്രേമികളായ പ്രദേശവാസികളുടെയും വിനോദസഞ്ചാരികളുടെ ശ്രീനഗറിലെ ഇഷ്ട ഇടമാണ് ഈ ഹോട്ടല്. രമേശിന്റെ മകന് ആകാശ് മെഹ്റയ്ക്കുനേരെ ഭീകരര് വെടിയുതിർത്ത ഫെബ്രുവരി 17 മുതല് അടഞ്ഞു കിടക്കുകയായിരുന്നു ഈ ഹോട്ടല്. ഹോട്ടലില് തിരക്കേറിയ സമയത്തായിരുന്നു ആക്രമണം നടന്നത്.
ഗുരുതരമായി പരിക്കേറ്റ ആകാശ് ചികിത്സയിലിരിക്കെ മരിച്ചു. നിരോധിത ഭീകരസംഘടനയായ ലഷ്കര്-ഇ-തയിബയോട് അനുഭാവം പുലര്ത്തുന്ന മൂന്ന് പേരെ ഫെബ്രുവരി 19ന് ജമ്മു കാശ്മീര് പൊലീസ് അറസ്റ്റ് ചെയ്തിരുന്നു. 1990-കളില് സജീവമായിരുന്ന ഭീകരസംഘടനയായ മുസ്ലിം ജന്ബാസ് ഫോഴ്സ് ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു.
