ലണ്ടന്‍: പ്രീമിയര്‍ ലീഗില്‍ ഒന്നാം സ്ഥാനത്ത്് തുടരുന്ന മാഞ്ചസ്റ്റര്‍ സിറ്റിക്ക് അപ്രതീക്ഷിത തോല്‍വി. ലീഡ്‌സ് യുണൈറ്റഡ് ഒന്നിനെതിരെ രണ്ട് ഗോളുകള്‍ക്കാണ് മാഞ്ചസ്റ്റര്‍ സിറ്റിയെ അട്ടിമറിച്ചത്. സ്റ്റുവര്‍ട്ട് ഡാളസിന്റെ ഇരട്ട ഗോളാണ് ലീഡ്‌സിന് വിജയം സമ്മാനിച്ചത്. സിറ്റിയുടെ ഏക ഗോള്‍ ഫെറാന്‍ ടോറസിന്റെ വകയായിരുന്നു.
ആദ്യ പകുതിയുടെ അവസാന നിമിഷങ്ങളില്‍ ഡാളസ് ലീഡ്‌സിനെ മുന്നിലെത്തിച്ചു. രണ്ടാം പകുതിയില്‍ തകര്‍ത്തുകളിച്ച മാഞ്ച്‌സ്റ്റര്‍ സിറ്റി 76-ാം മിനിറ്റില്‍ ലീഡ്്സിനൊപ്പം എത്തി. ഫെറാന്‍ ടോറസാണ് സ്‌കോര്‍ ചെയ്തത്.
മത്സരം സമനിലയിലേക്ക് നീങ്ങവേ ഇഞ്ചുറി ടൈമിന്റെ രണ്ടാം മിനിറ്റില്‍ ഡാളസ് നിര്‍ണായക ഗോളിലൂടെ ലീഡ്‌സിന് വിജയമൊരുക്കി.
ഈ വിജയത്തോടെ ലീഡ്‌സ് 31 മത്സരങ്ങളില്‍ 45 പോയിന്റുമായി ഒമ്പതാം സ്ഥാനത്തേക്ക് കയറി. തോറ്റെങ്കിലും മാഞ്ചസ്റ്റര്‍ സിറ്റി ഒന്നാം സ്ഥാനത്ത് തുടരുകയാണ്. 32 മത്സരങ്ങളില്‍ അവര്‍ക്ക്് 74 പോയിന്റുണ്ട്. 30 മത്സരങ്ങളില്‍ 60 പോയിന്റുള്ള മാഞ്ചസ്റ്റര്‍ യുണൈറ്റഡാണ് രണ്ടാം സ്ഥാനത്ത്.
മറ്റൊരു മത്സരത്തില്‍ വൂള്‍വര്‍ഹാംപ്റ്റണ്‍ ഏകപക്ഷീയമായ ഒരു ഗോളിന് ഫുല്‍ഹാമിനെ തോല്‍പ്പിച്ചു. രണ്ടാം പകുതിയുടെ ഇഞ്ചുറി ടൈമില്‍ ട്രോറെയാണ് വൂള്‍വര്‍ഹാപ്റ്റണിന്റെ വിജയഗോള്‍ നേടിയത്്.
പ്രതികരിക്കാൻ ഇവിടെ എഴുതുക: