തിരുവനന്തപുരം: യുവതീപ്രവേശനവുമായി ബന്ധപ്പെട്ട് ശബരിമലയിലുണ്ടായ സംഭവങ്ങളില് ഖേദം പ്രകടിപ്പിച്ച് മന്ത്രി കടകംപള്ളി സുരേന്ദ്രന് നടത്തിയ പ്രസ്താവന പരിശോധിക്കുമെന്ന് സിപിഎം ജനറല് സെക്രട്ടറി സീതാറാം യച്ചൂരി. കടകംപള്ളി എന്തുകൊണ്ട് അങ്ങനെ പറഞ്ഞുവെന്ന് പരിശോധിക്കുമെന്നായിരുന്നു യച്ചൂരിയുടെ പ്രതികരണം. ശബരിമല സുപ്രീംകോടതിയുടെ വിശാലബഞ്ചിന്റെ പരിഗണനയിലുള്ള വിഷയമാണ്. കോടതിയുടെ പരിഗണനയിലുള്ള വിഷയത്തില് ചര്ച്ച വേണ്ട. ഖേദപ്രകടനത്തില് മുഖ്യമന്ത്രിയും സംസ്ഥാന സമിതിയും വിശദീകരണം തേടുമെന്നും അദ്ദേഹം തിരുവനന്തപുരത്ത് വ്യക്തമാക്കി.
സത്യവാങ്മൂലം തിരുത്തുമോയെന്ന ചോദ്യത്തിന് ഇനി പ്രസക്തിയില്ല. അന്തിമവിധിക്കായി കാത്തിരിക്കണം. അതിനുശേഷം വിശദമായ ചര്ച്ച നടത്തുമെന്ന് മുഖ്യമന്ത്രി വ്യക്തമാക്കിയിട്ടുണ്ടെന്നും യച്ചൂരി കൂട്ടിച്ചേര്ത്തു.
