ചങ്ങനാശ്ശേരി: സര്ക്കാരിനും ഇടതുമുന്നണിക്കും പരോക്ഷ മുന്നറിയിപ്പ് നല്കി എന്എസ്എസ്. എന്എസ്എസിന്റെ നിലപാട് വിശ്വാസവും ആചാരാനുഷ്ഠാനവും സംരക്ഷിക്കുക എന്നതാണ്. അധികാരത്തിന്റെ തള്ളലില് ഇത് മറന്നുപോകുന്നവര്ക്ക് അതിന്റേതായ തിരിച്ചടി ഉണ്ടാകുമെന്ന കാര്യം ഉറപ്പാണെന്നും എന്എസ്എസ് ജനറല് സെക്രട്ടറി ജി. സുകുമാരന്നായര് പുറത്തിറക്കിയ വാര്ത്താ കുറിപ്പില് പറഞ്ഞു.
എന്എസ്എസ്സിനോ, നേതൃത്വത്തിലുള്ളവര്ക്കോ പാര്ലമെന്ററി മോഹങ്ങളൊന്നും തന്നെയില്ല. സ്ഥാനമാനങ്ങള്ക്കോ രാഷ്ട്രീയ നേട്ടങ്ങള്ക്കോ വേണ്ടി ഏതെങ്കിലും സര്ക്കാരുകളുടെയോ രാഷ്ട്രീയനേതാക്കളുടെയോ പടിവാതില്ക്കല് പോയിട്ടില്ല. ഏതെങ്കിലും രാഷ്ട്രീയനിലപാടിന്റെ അടിസ്ഥാനത്തിലല്ല അതിനുവേണ്ടി ആദ്യം മുതല് ഇറങ്ങിത്തിരിച്ചത്. ശബരിമലവിഷയത്തിന്റെ പേരില് എന്എസ്എസിനെതിരായുള്ള ചില ഇടതുപക്ഷനേതാക്കളുടെ വിമര്ശനം അതിരുകടക്കുന്നുണ്ട്. ഇത്തരം വിമര്ശനങ്ങളെ അര്ഹിക്കുന്ന അവഗണനയോടെ തള്ളിക്കളയുന്നെന്നും എന്എസ്എസ് ജനറല് സെക്രട്ടറി പറഞ്ഞു.
വിശ്വാസസംരക്ഷണത്തിനും സാമൂഹ്യനീതിക്കും വേണ്ടിയാണ് ഇന്നോളം എന്എസ്എസ് നിലകൊണ്ടിട്ടുള്ളത്. സംംഘടന എന്നും വിശ്വാസം സംരക്ഷിക്കുന്നവര്ക്കൊപ്പമാണ്, അതില് രാഷ്ട്രീയം കാണുന്നുമില്ലെന്നും വാര്ത്താക്കുറിപ്പില് വ്യക്തമാക്കി.
സിപിഐ സംസ്ഥാന സെക്രട്ടറി കാനം രാജേന്ദ്രന് എന്എസ്എസിനെതിരെ രൂക്ഷ വിമര്ശനവുമായി രംഗത്തുവന്നിരുന്നു. മുഖ്യമന്ത്രി പിണറായി വിജയനും കാനത്തിന്റെ വാക്കുകളോട് മൗനം പാലിച്ചിരുന്നു.
