പന്തളം: നഗരസഭാ ഭരണം ബിജെപി പിടിച്ചതോടെ പോലീസ് ഉദ്യോഗസ്ഥരെവരെ പങ്കെടുപ്പിച്ചുകൊണ്ട് സിപിഎമ്മിന്റെ തെരഞ്ഞെടുപ്പ് പ്രചരണം. ചെങ്ങന്നൂര്‍ ട്രാഫിക്കിലെ പോലീസുകാരനും, പോലീസ് അസോസിയേഷന്‍ ജില്ലാ സെക്രട്ടറിയുമായ വിവേകാണ് സിപിഎമ്മിനായി പരസ്യമായി രംഗത്തിറങ്ങിയിരിക്കുന്നത്.
ഇയാള്‍ കഴിഞ്ഞ ദിവസം സിപിഎം പോളിറ്റ് ബ്യൂറോ മെമ്പര്‍ എംഎ ബേബി ഉദ്ഘാടനം ചെയ്ത തെരഞ്ഞെടുപ്പ് പ്രചരണ പരിപാടിയില്‍ പങ്കെടുത്തു. പോലീസ് സേനയിലെ സിപിഎം പ്രവര്‍ത്തനത്തിന് മുഖ്യ പങ്ക് വഹിക്കുന്നത് വിവേകാണ്.
പോലീസിനുള്ളില്‍ പരസ്യമായ പാര്‍ട്ടി പ്രവര്‍ത്തനമാണ് വിവേകിന്റെ നേതൃത്വത്തില്‍ നടത്തുന്നതെന്ന് ആരോപണം നിലനില്‍ക്കെയാണ് പാര്‍ട്ടി പരിപാടിയില്‍ പരസ്യമായി പങ്കെടുത്തിരിക്കുന്നത്. തദ്ദേശ തെരഞ്ഞെടുപ്പില്‍ ബിജെപിയ്‌ക്കെതിരെ രഹസ്യമായി പ്രചാരണം നടത്തിയ ആളാണ് വിവേക്.
പോലീസ് ഉദ്യോഗസ്ഥന്‍ തന്നെ സിപിഎമ്മിന് വേണ്ടി പ്രചരണത്തിന് ഇറങ്ങിയതിനെതിരെ വ്യാപക പ്രതിഷേധമാണ് ഉയര്‍ന്നിരിക്കുന്നത്. സര്‍ക്കാര്‍ ഉദ്യോഗസ്ഥര്‍ രാഷ്‌ട്രീയ പാര്‍ട്ടികളുടെ തെരഞ്ഞെടുപ്പ് പ്രചരണങ്ങളില്‍ പങ്കെടുക്കരുതെന്ന നിര്‍ദേശം കാറ്റില്‍ പറത്തിയാണ് വിവേക് പരിപാടിയില്‍ പങ്കെടുത്തത്. ഇതു തെരഞ്ഞെടുപ്പ് തോല്‍വി മുന്നില്‍കണ്ടാണെന്നും ബിജെപി ആരോപിച്ചു.
പ്രതികരിക്കാൻ ഇവിടെ എഴുതുക: