ന്യൂദല്ഹി: രാജ്യസഭയില് നന്ദിപ്രമേയത്തിന് മറുപടി പറയവേ പ്രതിപക്ഷനേതാവും മുതിര്ന്ന കോണ്ഗ്രസ് നേതാവുമായ ഗുലാം നബി ആസാദിനെ പ്രശംസിച്ച് പ്രധാനമന്ത്രി നരേന്ദ്രമോദി.
മോദിയുടെ ഈ പ്രശംസ കോണ്ഗ്രസ് അംഗങ്ങളില് വരെ ആശ്ചര്യമുളവാക്കി. എപ്പോഴും സഭയില് മാന്യമായി സംസാരിക്കുന്ന നേതാവാണ് ഗുലാം നബി ആസ ആസാദെന്ന് മോദി പറഞ്ഞു. ‘ഒരിക്കലും മോശപ്പെട്ട വാക്കുകള് അദ്ദേഹം പറയാറില്ല. ഈ പാരമ്പര്യം പാര്ലമെന്റംഗങ്ങള് പഠിക്കേണ്ടതാണെന്നും മോദി പറഞ്ഞു.
തനിക്ക് അങ്ങേയറ്റം ബഹുമാനമുള്ള നേതാവാണ് ഗുലാം നബി ആസാദെന്നും മോദി പറഞ്ഞു. ‘കശ്മീരില് തെരഞ്ഞെടുപ്പ് നടന്നപ്പോള് അദ്ദേഹം അതിനെ പ്രശംസിച്ചു. താങ്കളുടെ പാര്ട്ടി ഞാന് പറയുന്നത് ശരിയായ അര്ത്ഥത്തില് എടുക്കുമെന്ന് വിശ്വിസിക്കുന്നു. പകരം ജി-23യില് നിന്നുള്ള നിര്ദേശത്തിന് ഞാന് കാതോര്ക്കുകയാണെന്ന് തെറ്റിദ്ധരിക്കില്ലെന്നും മോദി പറഞ്ഞു. സോണിയാ ഗാന്ധിയെ വിമര്ശിച്ച 23 നേതാക്കളെയാണ് മോദി ജി-23 എന്നതുകൊണ്ട് ഉദ്ദേശിക്കുന്നത്.
ഗുലാം നബി ആസാദിന്റെ രാജ്യസഭാംഗത്വം ഫിബ്രവരിയില് അവസാനിക്കും. പകരം അടുത്ത സീനിയറായ കോണ്ഗ്രസ് നേതാവിനെ സോണിയ രാജ്യസഭയിലെ പ്രതിപക്ഷനേതാവായി നിയമിക്കും. സീനിയര് കോണ്ഗ്രസ് നേതാക്കളായ ആനന്ദ് ശര്മ്മ, ജയറാം രമേഷ്, മല്ലികാര്ജുന് ഖാര്ഗെ എന്നിവര്ക്കാണ് പരിഗണന. സോണിയയുടെയും രാഹുലിന്റെ ഇഷ്ടക്കാരനായ ദിഗ് വിജയ്സിംഗിന്റെ പേരും ഉയരുന്നുണ്ട്. ചിലപ്പോള് അപ്രതീക്ഷിത നേതാവായി കപില് സിബലും വന്നുകൂടായ്കയില്ലെന്ന് പ്രവചിക്കപ്പെടുന്നു.
