കൊട്ടാരക്കര : കെഎസ്ആര്ടിസി ഡിപ്പോയില് നിന്നും കാണാതായ ബസ് പാരിപ്പള്ളി റോഡരികില് കണ്ടെത്തി. RAc 354 എന്ന വേണാട് ബസാണ് പാരിപ്പള്ളി റോഡരികില് ഉപേക്ഷിച്ച നിലയില് കണ്ടെത്തിയത്. നൂറ്റി ഇരുപത്തിമൂന്ന് ബസുകളാണ് ഡിപ്പോയില് ഉള്ളത്. സര്വ്വീസ് നടത്തേണ്ട ബസ് കാണാതെ വന്നതോടെ ബന്ധപ്പെട്ട ജീവനക്കാരാണ് ഡിപ്പോ അധികൃതരെ അറിയിച്ചത്.
ഇന്നലെ രാത്രി ഒമ്പതരയോടെ ഗ്യാരേജില് ബസ് സര്വീസിനു കയറ്റിയിരുന്നു. സര്വീസ് കഴിഞ്ഞ് രാത്രി പന്ത്രണ്ടരയോടെ ഡ്രൈവര് ബസ് സമീപത്തെ മുനിസിപ്പല് ഓഫിസിനു മുന്നില് പാര്ക്ക് ചെയ്തു. കെഎസ്ആര്ടിസി സ്റ്റാന്ഡിനോട് ചേര്ന്നാണ് ഇത്. ഇന്നു രാവിസെ ബസ് എടുക്കാന് എത്തിയപ്പോള് ബസ് അവിടെ ഉണ്ടായിരുന്നില്ല.
മറ്റേതെങ്കിലും ഡ്രൈവര് ബസ് മാറിയെടുത്തത് ആയിരിക്കാമെന്ന് കരുതി ഡിപ്പോയില് അറിയിച്ചു. തുടര്ന്ന് ഡിപ്പോയില് നിന്ന് ബസുമായി പോയ എല്ലാ ഡ്രൈവര്മാരേയും വിളിച്ചു. ആരും ബസ് എടുത്തില്ലെന്ന് വ്യക്തമാക്കിയതോടെ ഡിപ്പോ അധികൃതര് പോലീസിനെ അറിയിക്കുകയായിരുന്നു.
