മാസ്റ്ററിന്റെ റിലീസിന് പിന്നാലെ കൂടുതല്‍ ബിഗ് ബജറ്റ് സിനിമകള്‍ തിയറ്ററിലേക്ക്. ചിലംബരശന്‍ നായകനാകുന്ന ‘ഈശ്വരന്‍’ ഇന്നു തമിഴ്‌നാട്ടില്‍ റിലീസ് ചെയ്യും. ചിമ്പുവിന്റെ സിനിമകള്‍ക്ക് ചില തിയറ്റര്‍ ഉടമകള്‍ ഏര്‍പ്പെടുത്തിയ വിലക്ക് നീക്കികൊണ്ടാണ് സിനിമയുടെ റിലീസ്. നേരത്തെ ‘ഈശ്വരന്‍’ ഒ.ടി.ടി പ്ലാറ്റ് ഫോമില്‍ റിലീസ് ചെയ്യാന്‍ തീരുമാനിച്ചിരുന്നു.
ഇതിനെതിരെ വന്‍ പ്രതിഷേധമാണ് തിയറ്റര്‍ ഉടമകള്‍ ഉയര്‍ത്തിയത്. എന്നാല്‍, ഇന്നലെ സംവിധായകനും എഴുത്തുകാരനും ചിമ്പുവിന്റെ പിതാവുമായ ടി.രാജേന്ദറിന്റെ മധ്യസ്ഥതയില്‍ നടത്തിയ ചര്‍ച്ചകളില്‍ പ്രശ്‌നങ്ങള്‍ പരിഹരിച്ചത്.
സുശീന്ദ്രന്‍ സംവിധാനം ചെയ്യുന്ന ഈശ്വരനില്‍ നിധി അഗര്‍വാള്‍ ആണ് നായിക. വെണ്ണിള കബഡി കുഴു, നാന്‍ മഹാന്‍ അല്ല, രാജപാട്ടൈ, പാണ്ഡ്യ നാട്, ജീവ, പായും പുലി, കെന്നഡി ക്ലബ്ബ് തുടങ്ങിയ ഹിറ്റ് സിനിമകള്‍ ഒരുക്കിയ സംവിധായകനാണ് ശുചീന്ദ്രന്‍.
ഗ്രാമീണ പശ്ചാത്തലത്തില്‍ ഒരുക്കുന്ന ചിത്രത്തില്‍ ഭരതിരാജ, നന്ദിത ശ്വേത, ബാല ശരവണന്‍ തുടങ്ങിയവരാണ് മറ്റ് താരങ്ങള്‍. തമന്‍ ആണ് സംഗീതം നിര്‍വഹിചിരിക്കുന്നത്. ഗംഭീര മേക്കോവറിലാണ് ചിത്രത്തില്‍ ചിമ്പു എത്തുന്നത്. 100 കിലോ ഭാരത്തില്‍ നിന്നും 30 കിലോയാണ് താരം കുറച്ചത്. മേക്കോവര്‍ വീഡിയോ പങ്കുവെച്ചുകൊണ്ടാണ് ചിമ്പു മൂന്നു വര്‍ഷത്തിന് ശേഷം വീണ്ടും സമൂഹമാധ്യമങ്ങളില്‍ സജീവമായത്.
പ്രതികരിക്കാൻ ഇവിടെ എഴുതുക: