കൊച്ചി: കച്ചേരിപ്പടി ഭാഗത്ത് പ്രവര്‍ത്തിക്കുന്ന ശിങ്കാരം ലോട്ടറി കടയുടെ ഷട്ടര്‍ കുത്തിത്തുറന്ന് അലമാരയില്‍ സൂക്ഷിച്ചിരുന്ന ഒരു ലക്ഷം രൂപയും ലോട്ടറി ടിക്കറ്റുകളും മോഷ്ടിച്ച കേസിലെ പ്രതി സാബുവിനെ അറസ്റ്റ് ചെയ്തു. ശനിയാഴ്ച പുലര്‍ച്ചെ മൂന്ന് മണിയോടെ പ്രതി കടയുടെ മുന്‍വശത്ത് വന്ന് കിടക്കുകയും കടയുടെ ഷട്ടറിന്റെ താഴ് മുറിച്ചുമാറ്റുകയും ആയിരുന്നു. തുടര്‍ന്ന് പ്രതി അലമാരയില്‍ സൂക്ഷിച്ചിരുന്ന ഒരു ലക്ഷം രൂപയും കാരുണ്യ ലോട്ടറി ടിക്കറ്റുകളും മോഷ്ടിക്കുകയും ചെയ്തു.
കടയിലുണ്ടായിരുന്ന സിസിടിവിയില്‍ നിന്നാണ് പ്രതിയുടെ ദൃശ്യങ്ങള്‍ ലഭിച്ചത്. ലോട്ടറി ഉടമയുടെ പരാതിയില്‍ പോലീസ് കേസ് രജിസ്റ്റര്‍ ചെയ്യുകയും തുടര്‍ന്ന് നടന്ന അന്വേഷണത്തിലാണ് പ്രതി പിടിയിലായത്. ഞായറാഴ്ച രാത്രി 9 മണിക്ക് പട്രോളിങ് നടത്തുകയായിരുന്ന പോലീസിനെ കണ്ട് പ്രതി ഓടി രക്ഷപ്പെടാന്‍ ശ്രമിക്കുന്നതിനിടെയാണ് പ്രതിയെ പിടികൂടിയത്. പ്രതിയെ റിമാന്‍ഡ് ചെയ്തു.
എറണാകുളം ടൗണ്‍ നോര്‍ത്ത് സബ് ഇന്‍സ്‌പെക്ടര്‍ അനസ്. വി.ബി, അസിസ്റ്റന്റ് സബ് ഇന്‍സ്‌പെക്ടര്‍ നജീബ് സിവില്‍ പോലീസ് ഓഫീസര്‍മാരായ ദീപു, വിനീത്, നിധിന്‍ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. പ്രതിയില്‍ നിന്ന് എഴുപതിനായിരം രൂപയും, മോഷ്ടിച്ച ലോട്ടറി ടിക്കറ്റുകളും കണ്ടെടുത്തു.
പ്രതികരിക്കാൻ ഇവിടെ എഴുതുക: