കാത്തിരിപ്പുകള്‍ ഇനി കുറച്ചുനാള്‍ കൂടി. കെജിഎഫ് രണ്ടാംഭാഗത്തിന്റെ ടീസര്‍ പുറത്തുവിട്ട് അണിയറ പ്രവര്‍ത്തകര്‍. നടന്‍ യാഷിന്റെ ജന്മദിനമായ ജനുവരി എട്ടിന് പുറത്തിറക്കുമെന്നാണ് അണിയറ പ്രവര്‍ത്തകര്‍ ആദ്യം അറിയിച്ചിരുന്നത്. എന്നാല്‍ ടീസര്‍ ലീക്കായെന്ന വാര്‍ത്തകള്‍ പ്രചരിക്കാന്‍ തുടങ്ങിയതോടെ ഔദ്യോഗികമായി തന്നെ പുറത്തുവിടുകയായിരുന്നു.
യഷിന് പിറന്നാള്‍ ആശംസകള്‍ നേര്‍ന്നുകൊണ്ട് സംവിധായകന്‍ പ്രശാന്ത് നീവാണ് ടീസര്‍ പുറത്തിറക്കിയ വിവരം അറിയിച്ചത്. ‘ഒരിക്കല്‍ ഒരു വാഗ്ദാനം ചെയ്തു, ആ വാഗ്ദാനം പാലിക്കപ്പെടും!’ എന്ന കുറിപ്പും ആശംസയ്‌ക്കൊപ്പം സംവിധായകന്‍ പങ്കുവെച്ചിട്ടുണ്ട്.
യാഷും വില്ലന്‍ കഥാപാത്രത്തെ അവതരിപ്പിക്കുന്ന സഞ്ജയ് ദത്തുമാണ് ടീസറില്‍ ഉള്ളത്. സിനിമയുടെ ഒന്നാം ഭാഗത്തിനെ വെല്ലുന്ന തരത്തിലുള്ളതാണ് രണ്ടാം ഭാഗത്തിലെ രംഗങ്ങളെന്നാണ് സൂചന. ടീസര്‍ പുറത്തിറങ്ങി ഒമ്പത് മണിക്കൂറിനുള്ളില്‍ തന്നെ ഒന്നരക്കോടിയില്‍ അധികം ആളുകളാണ് ടീസര്‍ കണ്ടിട്ടുള്ളത്. ഇത്കൂടാതെ ഇരുപത് ലക്ഷം ലൈക്‌സും, ഒരു ലക്ഷത്തിനു മുകളില്‍ കമന്റ്‌സും ഇതിനോടകം തന്നെ ടീസര്‍ നേടിക്കഴിഞ്ഞു. മണിക്കൂറുകള്‍ക്കുള്ളില്‍ തന്നെ റോക്കിഭായി സോഷ്യല്‍ മീഡിയയില്‍ താരമാവുകയാണെന്ന സൂചനയാണ് ഇത് നല്‍കുന്നത്.
ശ്രീനിധി ഷെട്ടി നായികയാവുന്ന ചിത്രത്തില്‍ ബോളിവുഡ് താരം രവീണ ടണ്ടനും പ്രധാന വേഷത്തില്‍ എത്തുന്നുണ്ട്. കന്നഡത്തിന് പുറമെ മലയാളം, തമിഴ്, തെലുങ്ക്, ഹിന്ദി ഭാഷകളിലും ചിത്രം മൊഴിമാറ്റി പ്രദര്‍ശനത്തിന് എത്തും. ഹോമബിള്‍ ഫിലിംസാണ് യഷിന്റെ ബ്രഹ്‌മാണ്ഡ ചിത്രം നിര്‍മ്മിക്കുന്നത്. കൊവിഡ് പശ്ചാത്തലത്തില്‍ നിര്‍ത്തിവച്ചിരുന്ന ഓഗസ്റ്റ് 26നാണ് കെജിഎഫ് 2 ന്റെ ചിത്രീകരണം പുനരാരംഭിച്ചത്. എന്നാല്‍ 90 ശതമാനം രംഗങ്ങളും കൊവിഡ് പ്രതിസന്ധിക്കു മുന്‍പേ പൂര്‍ത്തിയാക്കിയിരുന്നു. ഇതിനിടെ കാന്‍സര്‍ രോഗം ഉണ്ടെന്നു കണ്ടെത്തിയതിനെത്തുടര്‍ന്ന് സഞ്ജയ് ദത്ത് ചികിത്സയ്‌ക്കുവേണ്ടി ചിത്രീകരണത്തില്‍ നിന്ന് ഇടവേളയെടുത്തിരുന്നു.
1951 മുതല്‍ വര്‍ത്തമാനകാലം വരെയുള്ള കഥയാണ് കെജിഎഫ് രണ്ടാം ഭാഗത്തില്‍ പറയുന്നത്. 2018 ഡിസംബര്‍ 21-നാണ് ചിത്രത്തിന്റെ ആദ്യഭാഗം പുറത്തിറങ്ങിയത്. തെന്നിന്ത്യയില്‍ ആകെ തരംഗം സൃഷ്ടിച്ച ചിത്രത്തിന്റെ രണ്ടാം ഭാഗം കേരളത്തില്‍ പ്രദര്‍ശനത്തിനെത്തിക്കുന്നത് പൃഥ്വിരാജ് പ്രൊഡക്ഷന്‍സാണ്. കന്നഡയില്‍ ഇതുവരെ നിര്‍മ്മിക്കപ്പെട്ടതില്‍ ഏറ്റവും നിര്‍മാണച്ചെലവേറിയ ചിത്രമായിരുന്നു കെജിഎഫ്.
പ്രതികരിക്കാൻ ഇവിടെ എഴുതുക: