എരുമപ്പെട്ടി: പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച് ഗര്ഭിണിയാക്കി കടന്ന് കളഞ്ഞ കര്ണ്ണാടക സ്വദേശി പിടിയില്. ചാമരാജ് നഗര് കോടിമല സ്വദേശി ചിന്ന സ്വാമി (24)യെയാണ് എരുമപ്പെട്ടി പോലീസ് ഇന്സ്പെക്ടര് കെ.കെ. ഭൂപേഷിന്റെ നേതൃത്വത്തില് കര്ണ്ണാടകയില് നിന്ന് അറസ്റ്റ് ചെയ്തത്.
2019 ആഗസ്റ്റിലാണ് വേലൂര് കോടശേരി സ്വദേശിനിയായ 15 വയസുകാരി പീഡനത്തിനിരയായത്. വേലൂരില് താറാവ് വളര്ത്തി കഴിയുകയായിരുന്ന പ്രതി പ്രണയം നടിച്ച് പ്രലോഭിപ്പിച്ച് പുലിയന്നൂര് പാടശേഖരത്തില് വെച്ചാണ് കുട്ടിയെ പീഡിപ്പിച്ചത്. സംഭവത്തിന് ശേഷം ഇയാള് കര്ണ്ണാടകയില് പോയി അവിടെ വിവാഹം കഴിച്ച് കഴിയുകയായിരുന്നു. അടയ്ക്ക വ്യാപാരമായിരുന്നു ജോലി.
2020 ഏപ്രിലില് പെണ്കുട്ടി പ്രസവിച്ചപ്പോഴാണ് സംഭവം പുറത്തറിഞ്ഞത്. തുടര്ന്ന് എരുമപ്പെട്ടി പോലീസ് പോക്സോ വകുപ്പില് കേസെടുത്ത് അന്വേഷണം ആരംഭിച്ചു. എഎസ്ഐമാരായ സന്തോഷ് ദേവസി, കെ.ആര്. ജയന്, സിപിഒ ശ്രീനാഥ് എന്നിവരും അന്വേഷണ സംഘത്തിലുണ്ടായിരുന്നു.
