തൃക്കരിപ്പൂര്‍: നാലുപതിറ്റാണ്ടുകാലമായി പൂരക്കളി മറത്തു കളി രംഗത്തെ സജീവ സാന്നിദ്ധ്യമായ കാനക്കീല്‍ കമലാക്ഷന്‍ പണിക്കര്‍ക്ക് കേരള ഫോക് ലോര്‍ അക്കാഡമിയുടെ അംഗീകാരം. അമ്മാവന്‍ പരേതനായ കാനക്കീല്‍ കരുണാകരന്‍ പണിക്കരില്‍ നിന്നും പൂരക്കളിയും കരിവെള്ളൂര്‍ വി.പി. ദാമോദരന്‍ പണിക്കരില്‍ നിന്ന് മറത്തുകളിയുടെ പാഠങ്ങളുമാണ് കമലാക്ഷന്‍ പണിക്കരുടെ കലാസപര്യയുടെ അടിസ്ഥാനം.
കണ്ണൂര്‍ കാസര്‍കോട് ജില്ലകളിലെ വിവിധ ക്ഷേത്രങ്ങളില്‍ ഈ അനുഷ്ഠാന കലയില്‍ പ്രാഗത്ഭ്യം നേടിയ ഈ സംസ്‌കൃകൃത പണ്ഡിതനെ തേടി ഇതിനു മുന്‍പും അംഗീകാരങ്ങള്‍ തേടിയെത്തിയിട്ടുണ്ട്. 1982ല്‍ ശ്രീകണ്ണമംഗലം കഴകത്തിലായിരുന്നു മറത്തുകളി അരങ്ങേറ്റം. 2006 ല്‍ പയ്യന്നൂര്‍ ശ്രീ കാപ്പാട്ട് കഴകത്തില്‍ നിന്ന് പട്ടും വളയും ലഭിച്ചു. 2011 ല്‍ മറത്ത് കളി രംഗത്തെ പരമോന്നത ബഹുമതിയായ വീരശൃംഖല നല്‍കി മടിക്കൈ നാദക്കോട്ട് കഴകം ആദരിച്ചു. ഇപ്പോഴും മറത്തുകളി രംഗത്ത് സജീവമായ ഇദ്ദേഹം ഇളമ്പച്ചി സ്വദേശിയാണ്. പ്രശസ്ത ചെങ്കല്‍ ശില്പി പരേതനായ തെക്കടവന്‍ അപ്പു മണിയാണി കാനക്കീല്‍ ദേവകി അമ്മ ദമ്പതികളുടെ മകനാണ്.
പ്രതികരിക്കാൻ ഇവിടെ എഴുതുക: