ന്യൂദല്‍ഹി : ജനിതക മാറ്റം സംഭവിച്ച കൊറോണ വൈറസ് പടരുന്ന സാഹചര്യത്തില്‍ ബ്രിട്ടണില്‍ നിന്നുള്ള വിമാനങ്ങള്‍ക്ക് രാജ്യത്ത് ഏര്‍പ്പെടുത്തിയ വിലക്ക് നീട്ടി. ജനുവരി ഏഴ് വരെയാണ് വിലക്ക് ഇപ്പോള്‍ നീട്ടിയിരിക്കുന്നതെന്ന് കേന്ദ്ര വ്യോമയാന മന്ത്രി ഹര്‍ദീപ് സിങ് പുരി അറിയിച്ചു.
ജനിതക മാറ്റം സംഭവിച്ച കൊറോണ വൈറസ് ബ്രിട്ടണില്‍ കണ്ടെത്തുകയും ഇത് പടരുന്നത് ശ്രദ്ധയില്‍ പെട്ടതോടെ ഈ മാസം 31 വരെ ബ്രിട്ടണില്‍ നിന്നുള്ള വിമാനങ്ങള്‍ക്ക് വിലക്ക് ഏര്‍പ്പെടുത്തിക്കൊണ്ട് കഴിഞ്ഞയാഴ്ചയാണ് കേന്ദ്ര സര്‍ക്കാര്‍ ഉത്തരവിറക്കിയത്. എന്നാല്‍ മുന്‍കരുതലിന്റെ ഭാഗമായി വിമാനങ്ങള്‍ക്കുള്ള വിലക്ക് നീട്ടിയേക്കുമെന്ന് നേരത്തെ ഹര്‍ദീപ് സിങ് പുരി മുന്നറിയിപ്പ് നല്‍കിയിരുന്നു. രാജ്യത്തെ വിമാനത്താവളങ്ങളില്‍ കനത്ത ജാഗ്രതാ നിര്‍ദേശവും നല്‍കിയിട്ടുണ്ട്.
അതേസമയം ഇന്ത്യയില്‍ ബ്രിട്ടണില്‍ നിന്നെത്തിയ 20 പേര്‍ക്ക് ജനിതകമാറ്റം സംഭവിച്ച കോവിഡ് റിപ്പോര്‍ട്ട് ചെയ്തിട്ടുണ്ട്. ഇതിനെ തുടര്‍ന്ന് ബ്രിട്ടണില്‍ നിന്നും എത്തുന്നവരെ പ്രത്യേകം നിരീക്ഷണത്തില്‍ ആക്കുന്നതുള്‍പ്പെടെ കര്‍ശന നടപടികളാണ് ഇന്ത്യ സ്വീകരിച്ചുവരുന്നത്. കഴിഞ്ഞ രണ്ടാഴ്ചയ്‌ക്കിടെ വിദേശത്ത് നിന്നും ഇന്ത്യയിലെത്തിയവര്‍ ജീനോം സ്വീക്വന്‍സിങ് ടെസ്റ്റിന് വിധേയരാകണമെന്നും കേന്ദ്ര ആരോഗ്യ മന്ത്രാലയം അറിയിച്ചിട്ടുണ്ട്. ജനിതകമാറ്റം സംഭവിച്ച കോവിഡ് ബാധിച്ചവരുമായി സമ്പര്‍ക്കം ഉണ്ടായിരുന്നവരേയും ആരോഗ്യപ്രവര്‍ത്തകര്‍ നിരീക്ഷിച്ചു വരികയാണ്.
ജനിതക മാറ്റം സംഭവിച്ച കൊറോണ വൈറസിന്റെ സാന്നിധ്യം ബ്രിട്ടണില്‍ കണ്ടെത്തിയതായി പ്രധാനമന്ത്രി ബോറിസ് ജോണ്‍സണ്‍ ഈ മാസം 22നാണ് അറിയിച്ചത്. നവംബര്‍ 25ന് ശേഷം 33000 ആളുകളാണ് ബ്രിട്ടണില്‍ നിന്നും ഇന്ത്യയിലെത്തിയത്. ഇവരില്‍ 144 പേര്‍ക്ക് കൊറോണ സ്ഥിരീകരിച്ചിട്ടുണ്ട്. എന്നാല്‍ ഇവരുടെ സാമ്പിളുകള്‍ പരിശോധനയ്‌ക്കായി അയച്ചു കൊടുത്തിരുന്നു. ഇതില്‍ നിന്നുള്ളവര്‍ക്കാണ് ജനിതക മാറ്റം സംഭവിച്ച കൊറോണ സ്ഥിരീകരിച്ചത്.
പ്രതികരിക്കാൻ ഇവിടെ എഴുതുക: