പാലക്കാട്: പഠിച്ച് ജോലി വാങ്ങി അനീഷിന്റെ മാതാപിതാക്കളെ നോക്കും. അനീഷിനെ കൊലപ്പെടുത്തിയ പ്രതികള്‍ക്ക് കടുത്ത ശിക്ഷ നല്‍കണമെന്ന് ഭാര്യ ഹരിത. അനീഷിന്റെ മാതാപിതാക്കള്‍ക്കൊപ്പം മാധ്യമ പ്രവര്‍ത്തകരോട് സംസാരിക്കുകയായിരുന്നു ഹരിത.
ഇനിയുള്ള കാലം അനീഷിന്റെ മാതാപിതാക്കള്‍ക്കൊപ്പം തന്നെ താമസിക്കും. പഠിച്ച് നല്ലൊരു ജോലി വാങ്ങി തന്റെ അപ്പു നോക്കിയത് പോലെ അച്ഛനേയും അമ്മയേയും നോക്കും. പ്രതികള്‍ക്ക് കടുത്ത ശിക്ഷ നല്‍കുമെന്നാണ് പ്രതീക്ഷിക്കുന്നത്. പ്രതീക്ഷയല്ല സര്‍ക്കാര്‍ അത് നടത്തിക്കൊടുക്കണമെന്നും ഹരിത പറഞ്ഞു.
ഹരിതയെ മകളപോലെ തന്നെ നോക്കും. അതാണ് തങ്ങളുടെ ആഗ്രഹമെന്നും അനീഷിന്റെ പിതാവ് അറുമുഖനും അറിയിച്ചു. ഹരിതയെ ആഗ്രഹം പോലെ തുടര്‍ന്നു പഠിപ്പിക്കണം. അതിനുള്ള കഴിവ് തങ്ങള്‍ക്കില്ല. തുടര്‍ പഠനത്തിനുള്ള സഹായം സര്‍ക്കാര്‍ നല്‍കണം. കേസില്‍ ഹരിതയുടെ മുത്തച്ഛന്‍ കുമരേശന്‍ പിള്ളയെ കൂടി പ്രതിചേര്‍ക്കണമെന്നും അറുമുഖന്‍ ആവശ്യപ്പെട്ടു.
വെള്ളിയാഴ്ചയാണ് തേങ്കുറിശ്ശി ഇലമന്ദം സ്വദേശി അനീഷിനെ ഭാര്യാപിതാവായ പ്രഭുകുമാര്‍, ഭാര്യയുടെ അമ്മാവന്‍ സുരേഷ് എന്നിവര്‍ ചേര്‍ന്ന് കുത്തിക്കൊന്നത്. സംഭവത്തില്‍ ഇരുവരെയും പോലീസ് പിടികൂടിയിരുന്നു. കേസില്‍ ക്രൈംബ്രാഞ്ച് സംഘം അന്വേഷണം ആരംഭിച്ചിട്ടുണ്ട്. കേസില്‍ 90 ദിവസത്തിനകം കുറ്റപത്രം സമര്‍പ്പിക്കാനാണ് തീരുമാനം.
പ്രതികരിക്കാൻ ഇവിടെ എഴുതുക: