കൊട്ടിയൂരിൽ സിപിഎമ്മുകാർ ബിജെപി ഓഫീസ് തകർത്തു : ബിജെപി നടത്തിയ ഹർത്താൽ പൂർണ്ണം

ഇരിട്ടി : കൊട്ടിയൂരിലെ ബി ജെ പി ഓഫീസ് ഒരു സംഘം സി പി എം ക്രിമിനലുകൾ തകർത്തു. വ്യാഴാഴ്ച  രാത്രി 10 മണിയോടെ ആണ് കൊട്ടിയൂർ ടൗണിൽ പ്രവർത്തിക്കുന്ന ബി ജെ പി ഓഫീസ് സംഘടിച്ചെത്തിയ സി പി എമ്മുകാർ തകർത്തത്. ഓഫീസിന്റെ ചില്ലുകളും അകത്തുണ്ടായിരുന്ന കസേരകളും മറ്റ് ഉപകരണങ്ങളും അടിച്ചു തകർത്തു . സംഭവത്തിൽ പ്രതിഷേധിച്ച് ബി ജെ പി , സംഘപരിവാർ സംഘടനകളുടെ നേതൃത്വത്തിൽ ശനിയാഴ്ച കൊട്ടിയൂർ പഞ്ചായത്തിൽ ഹർത്താൽ ആചരിച്ചു. രാവിലെ 6 മുതൽ 6 വരെ നടന്ന  ഹർത്താൽ പൂർണമായിരുന്നു. അവശ്യ സേവനങ്ങളേയും പഞ്ചായത്തിന് പുറത്തു നിന്നുള്ള വാഹനങ്ങളെയും ഹർത്താലിൽ നിന്നും ഒഴിവാക്കിയിരുന്നു. 

സി പി എം അക്രമത്തിൽ പ്രതിഷേധിച്ച് ശനിയാഴ്ച വൈകുന്നേരം കൊട്ടിയൂരിൽ ബി ജെ പി,  സംഘ പരിവാർ സംഘടനകളുടെ നേതൃത്വത്തിൽ പ്രകടനവും പ്രതിഷേധ യോഗവും നടന്നു.  യോഗത്തിൽ ജില്ലാ ജനറൽ സിക്രട്ടറി ബിജു എളക്കുഴി, മണ്ഡലം സിക്രട്ടറി എം.ആർ. സുരേഷ് എന്നിവർ  സംസാരിച്ചു. ബി ഡി ജെ എസ് സംസ്ഥാന വൈസ് പ്രസിഡന്റ് പൈലി വാത്യാട്ട്, ബി ഡി എം എസ് ജില്ലാ പ്രസിഡന്റ് ജോവാൻ അനിരുദ്ധൻ,  ബി ജെ പി മണ്ഡലം സിക്രട്ടറിമാരായ പി.ജി. സന്തോഷ്, പ്രിജേഷ് അളോറ , യുവമോർച്ച ജില്ലാ ഉപാദ്ധ്യക്ഷൻ അരുൺ ഭരത്, ആർ എസ് എസ് ഖണ്ഡ് കാര്യവാഹ് രൂപേഷ്, കൊട്ടിയൂർ പഞ്ചായത്ത് കമ്മിറ്റി പ്രസിഡന്റ് ശശി കൊട്ടിയൂർ, ഷാജി മറ്റപ്പള്ളി, വിവേക് കീഴൂർ, അനൂപ്, സുബിൻ എന്നിവർ പ്രതിഷേധ പ്രകടനത്തിന് നേതൃത്വം നൽകി.