ബാംബോലിം: ഐഎസ്എല്‍ ഏഴാം സീസണില്‍ ഇതുവരെ കളിച്ച അഞ്ചു മത്സരങ്ങളിലും കേരളത്തിന്റെ സ്വന്തം ടീമായ ബ്ലാസ്‌റ്റേഴ്‌സിന് വിജയം തൊടാനായില്ല. ഇന്നെങ്കിലും ഒരു ജയം കാണാന്‍ ആരാധകര്‍ കൊതിക്കുകയാണ്. ആറാം മത്സരത്തില്‍ കൊല്‍ക്കത്തയിലെ ഈസ്റ്റ് ബംഗാളാണ് എതിരാളികള്‍. ജിഎംസി സ്‌റ്റേഡിയത്തില്‍ രാത്രി ഏഴരയ്‌ക്ക് കളി തുടങ്ങും. സ്റ്റാര്‍ സ്‌പോര്‍ട്‌സില്‍ തത്സമയം കാണാം.
ഐഎസ്എല്ലില്‍ ഇതാദ്യമായാണ് ആദ്യ അഞ്ചു മത്സരങ്ങളില്‍ ബ്ലാസ്‌റ്റേഴ്‌സിന് വിജയം നേടാന്‍ കഴിയായെ പോകുന്നത്. അഞ്ചു മത്സരങ്ങളില്‍ രണ്ട് പോയിന്റാണുള്ളത്. പത്ത് ഗോളുകളും വഴങ്ങി. ഇതും മോശം റെക്കോഡാണ്. പ്രതിരോധത്തിലെ പിഴവുകളാണ് ആദ്യ മത്സരങ്ങളില്‍ ബ്ലാസ്‌റ്റേഴ്‌സിന് തിരിച്ചടിയായത്. പക്ഷെ ഈ തോല്‍വികളൊന്നും പരിശീലകനായ കിബു വിക്കൂനയെ സമ്മര്‍ദ്ദത്തിലാക്കുന്നില്ല. വിജയത്തിനായി കഴിയുന്നതെല്ലാം ചെയ്യും. ടീമിലാണ് എന്റെ ശ്രദ്ധ. ടീമില്‍ വിശ്വാസമുണ്ട്. വിജയിക്കാനായി മികച്ച ടീമിനെ തന്നെ കളത്തിലിറക്കുമെന്ന് വിക്കൂന പറഞ്ഞു.
മത്സരത്തിനായി എല്ലാ കളിക്കാരും തയ്യാറെടുത്തുകഴിഞ്ഞു. സഹല്‍ മികച്ച കളിക്കാരനാണ്. അദ്ദേഹത്തിന് ചില ശാരീരിക പ്രശ്‌നങ്ങള്‍ ഉണ്ടായിരുന്നു. ഇന്ന്കളിക്കളത്തില്‍ ഇറങ്ങുമെന്നും വിക്കുന വെളിപ്പെടുത്തി.
പ്രീ സീസണില്‍ ഈസ്റ്റ് ബംഗാളിനെതിരെ ഞങ്ങള്‍ കളിച്ചതാണ്. അവരുടെ അഞ്ചു മത്സരങ്ങളും കണ്ടിരുന്നു. മികച്ച വിദേശ താരങ്ങള്‍ അവര്‍ക്കുണ്ട്്. ഇന്ന് നല്ലൊരു മത്സരം തന്നെ പ്രതീക്ഷിക്കാം.
ഐഎസ്എല്ലില്‍ ഈസ്റ്റ് ബംഗാളിനും ഇതുവരെ വിജയം നേടാനായിട്ടില്ല. കളിച്ച അഞ്ചു മത്സരങ്ങില്‍ നാലിലും തോറ്റു. ഒരു പോയിന്റ് മാത്രമുളള അവര്‍ ഏറ്റവും പിന്നിലാണ്.
ഇന്ന്് വൈകിട്ട് അഞ്ചിന് നടക്കുന്ന ആദ്യ മത്സരത്തില്‍ ഹൈദരാബാദ് എഫ്‌സി മുംബൈ എഫ്്‌സിയെ നേരിടും.
പ്രതികരിക്കാൻ ഇവിടെ എഴുതുക: