ആറ്റിങ്ങൽ നഗരത്തിലും പരിസരപ്രദേശത്തും വീശിയടിച്ച കാറ്റിൽ പരക്കെ നാശനഷ്ടം, പരിഭ്രാന്തരായി ജനം

തിരുവനന്തപുരം: ആറ്റിങ്ങൽ നഗരത്തിലും പരിസരപ്രദേശത്തും അപ്രതീക്ഷിതമായി വീശിയടിച്ച കാറ്റിൽ പരക്കെ നാശനഷ്ടം. ഇന്ന് രാവിലെയാണ് കാറ്റ് വീശിയത്. ശക്തമായ കാറ്റിൽ നിരവധി വീടുകളുടെ മേൽക്കൂരകൾ തകർന്നു. മാർക്കറ്റ് റോഡിന് സമീപത്ത് കാട്ടിൽപുത്തൻ വീട് രാജുവിന്റെ വീട് ഭാഗികമായി തകർന്നു.

വീടിന്റെ മേൽക്കൂര പറന്ന് അടുത്ത പുരയിടത്തിൽ പതിക്കുകയും അടുക്കള ഭാഗത്തെ ചുമരുകൾ ഇടിഞ്ഞു വീഴുകയും ചെയ്തു. ഒച്ചകേട്ട് വീട്ടിനകത്തുള്ളവർ പെട്ടെന്ന് പുറത്തേക്ക് ഇറങ്ങിയതിനാൽ വൻ അപകടം ഒഴിവായി. കാറ്റിൽ മരങ്ങൾ ഒടിഞ്ഞുവീണ് ഗതാഗത തടസം ഉണ്ടായി. പലയിടത്തും വൈദ്യുതിബന്ധവും തകർന്നു.  

ഇന്ന് രാവിലെയാണ് പൊടിക്കാറ്റ് ആഞ്ഞുവീശിയത്. അപ്രതീക്ഷിതമായി വീശിയ കാറ്റ് ആളുകളിൽ പരിഭ്രാന്തി സൃഷ്ടിച്ചു.