കൊച്ചി: തെരഞ്ഞെടുപ്പു പ്രചാരണത്തില്‍നിന്ന് ഓടിയൊളിക്കുകയും ഫലം വന്നപ്പോള്‍ വിജയിച്ചെന്ന് വീമ്പിളക്കുകയും ചെയ്യുന്ന മുഖ്യമന്ത്രി എട്ടുകാലി മമ്മൂഞ്ഞ് ചമയുകയാണെന്ന് കേന്ദ്രമന്ത്രി വി. മുരളീധരന്‍. തെരഞ്ഞെടുപ്പ് സംസ്ഥാന സര്‍ക്കാരിന്റെ വിലയിരുത്തലായിരുന്നില്ല. പ്രാദേശിക ഭരണങ്ങളുടേയും അംഗങ്ങളുടേയും ഭരണ തലവന്മാരുടേയും വിലയിരുത്തലായിരുന്നു. അതില്‍ മുന്നേറ്റം ബിജെപി- എന്‍ഡിഎക്ക് മാത്രമാണെന്നും കേന്ദ്ര മന്ത്രി പറഞ്ഞു. എറണാകുളം ജില്ലയില്‍ തദ്ദേശ സ്വയംഭരണ തെരഞ്ഞെടുപ്പില്‍ വിജയിച്ചവരെ ആദരിക്കുന്ന ചടങ്ങ് ഉദ്ഘാടനം ചെയ്യുകയായിരുന്നു.
തെരഞ്ഞെടുപ്പില്‍ എല്‍ഡിഎഫ് വിജയിച്ചുവെന്നും സര്‍ക്കാര്‍ നിലപാടുകള്‍ ജനങ്ങള്‍ അംഗീകരിച്ചുവെന്നും ചില ഏജന്‍സികള്‍ വഴി നടത്തുന്ന പ്രചാരണം മാത്രമാണ്. എല്‍ഡിഎഫനും യുഡിഎഫിനും വോട്ടും സീറ്റും കുറവാണ്. ബിജെപിക്ക് 23 ശതമാനം സീറ്റ് വര്‍ദ്ധനയുണ്ടായി.
ത്രിതല പഞ്ചായത്തിലും മുനിസിപ്പല്‍- കോര്‍പ്പറേഷനുകളിലും കഴിഞ്ഞ തെരഞ്ഞെടുപ്പില്‍ വിജയച്ചത് 1321 പേരാണ്. ഇത്തവണ അത് എന്‍ഡിഎയ്‌ക്ക് 1625 ആക്കി ഉയര്‍ത്താനായി. എന്നിട്ടും എല്‍ഡിഎഫിന് അഭിമാന നേട്ടം എന്ന് പ്രചരിപ്പിക്കാനും ചില മാധ്യമങ്ങള്‍ അത് പിന്തുടരാനും തയാറായി. ഈ പ്രചാരണത്തിലൂടെ കേരളത്തിലെ വിദ്യാസമ്പന്നരായ ജനങ്ങളെ വഞ്ചിക്കാനാകില്ല, മുരളീധരന്‍ പറഞ്ഞു.
പ്രതികരിക്കാൻ ഇവിടെ എഴുതുക