കൊച്ചി : സ്വര്‍ണക്കടത്ത് കേസ് മുഖ്യപ്രതി സ്വപ്ന സുരേഷിന്റെ വിവാദ ശബ്ദരേഖ റെക്കോര്‍ഡ് ചെയ്യാന്‍ സഹായിച്ചതിന് പിന്നില്‍ ഇടത് അനുഭാവിയായ പോലീസ് ഓഫീസര്‍. തൃപ്പൂണിത്തുറ വനിതാ സെല്ലിലെ ഇടത് അനുഭാവിയായ സീനിയര്‍ സിവില്‍ പോലീസ് ഓഫീസറുടെ സഹായത്താലാണ് ശബ്ദരേഖ റെക്കോര്‍ഡ് ചെയ്യാന്‍ സാധിച്ചതെന്നാണ് സൂചന.
വനിതാ പോലീസ് വിളിച്ചുതന്ന ഫോണില്‍ സംസാരിച്ചിരുന്നതായും ആ വിവരങ്ങളാണ് പുറത്തുവന്നതെന്നും സ്വപ്ന കസ്റ്റംസിനു നല്‍കിയ മൊഴിയില്‍ പറയുന്നുണ്ട്. തുടര്‍ന്ന് കേന്ദ്ര ഏജന്‍സികളും ഇത് സംബന്ധിച്ച് അന്വേഷണം നടത്തിയിരുന്നു. ഇത് കൂടാതെ കേരള പോലീസ് ഓഫീസേഴ്‌സ് അസോസിയേഷന്‍ സംസ്ഥാന നേതാവും ഇത് റെക്കോര്‍ഡ് ചെയ്യുന്നതിലും പുറത്തുവിടുന്നതിലും പങ്കാളിയായതായി സൂചനയുണ്ട്.
എന്‍ഫോഴ്‌സ്‌മെന്റ് ഡയറക്ടറേറ്റിന്റെ കസ്റ്റഡിയിലിരിക്കേ സ്വപ്‌നയ്‌ക്ക് അഞ്ച് പോലീസുകാരാണ് കാവലുണ്ടായിരുന്നത്. ഇവരെല്ലാം ഇടത് അനുഭാവികളാണ്. സ്വപ്നയെ ഒരു തവണ ആശുപത്രിയില്‍ പ്രവേശിപ്പിച്ചപ്പോള്‍ മാത്രമാണ് മറ്റു രണ്ട് വനിതാ പോലീസുകാര്‍ കാവലിനുണ്ടായിരുന്നത്. അതേസമയം ഇടതുപക്ഷ ആഭിമുഖ്യമുള്ള വനിതാ പോലീസുകാരെ സ്ഥിരമായി കാവലിനു നിയോഗിച്ചതിനു പിന്നില്‍ ഗൂഢാലോചനയാണെന്നും കേന്ദ്രസംഘം സംശയിക്കുന്നുണ്ട്.
പ്രതികരിക്കാൻ ഇവിടെ എഴുതുക: