പോലീസിനെ വെട്ടിച്ച് കഞ്ചാവുമായി രക്ഷപ്പെട്ട കൗമാരക്കാര്‍ ഓടിക്കയറിയത് സ്‌റ്റേഷനിലേക്ക്

കട്ടപ്പന: കമ്പംമെട്ടില്‍ കഞ്ചാവുമായി ബൈക്കിലെത്തി പരിശോധ സംഘത്തെ വെട്ടിച്ച രക്ഷപ്പെട്ട നാലംഗ സംഘത്തിലെ രണ്ട് പേര്‍ ഓടി കയറിയത് പോലീസ് സറ്റേഷന്റെ മുറ്റത്തേക്ക്. സംഭവത്തില്‍ 17 വയസുകാരനുള്‍പ്പടെ നാല് പേരേ കഞ്ചാവുമായി പോലീസ് പിടികൂടി. രണ്ട് ബൈക്കുകളില്‍ നിന്നായി 3 കിലോയോളം കഞ്ചാവാണ് പിടികൂടിയത്.

അടിമാലി 200 ഏക്കര്‍ പുത്തന്‍പുരക്കല്‍ വിനീത്(20), എറണാകുളം കൊച്ചുമഠത്തില്‍ ആദര്‍ശ്(18), അടിമാലി ഇസ്‌ളാംനഗറില്‍ സബിര്‍ റഹ്മാന്‍(22) എന്നിവരാണ് പിടിയിലായത്. ഇന്നലെ ഉച്ചയോടെകേരള തമിഴ്‌നാട് അതിര്‍ത്തിയായ കമ്പംമെട്ടില്‍ പോലീസ്, എക്‌സൈസ്, സെയില്‍ ടാക്‌സ് ഉദ്യോഗസ്ഥരുടെ നേതൃത്വത്തില്‍ വാഹന പരിശോധന നടത്തുന്നതിനിടെയാണ് സംഭവം.
ഇതിനിടെ തമിഴ്‌നാട് പോലീസ് കൈകാണിച്ചിട്ടും നിര്‍ത്താതെഅതിര്‍ത്തി കടക്കാന്‍ ശ്രമിച്ച ഇരുചക്രവാഹനം കേരള പോലീസും, എക്‌സൈസും, വാണിജ്യനികുതി വകുപ്പ് ഉദ്യോഗസ്ഥരും ചേര്‍ന്ന് തടയാന്‍ ശ്രമിച്ചു. സംയുക്ത പരിശോധന സംഘത്തെ വെട്ടിച്ച് രക്ഷപെടാന്‍ ശ്രമിച്ച രണ്ടംഗ സംഘം സഞ്ചരിച്ചിരുന്ന വാഹനത്തിന്റെ നിയന്ത്രണം നഷ്ടപ്പെട്ടു മറിഞ്ഞു.

വാഹനത്തിലുണ്ടായിരുന്ന വിനീതും, 17 വയസുകാരനും ഓടി രക്ഷപെടാന്‍ മുന്നില്‍ കണ്ട വഴിയിലൂടെ ഓടി. ചെന്ന് നിന്നത് കമ്പംമെട്ട് പോലീസ് സ്റ്റേഷന്റെ മുറ്റത്താണ്. 17 വയസുകാരന്റെ കയ്യിലിരുന്ന ബാഗ് പരിശോധിച്ചപ്പോള്‍ 2 കിലോ കഞ്ചാവ് കണ്ടെത്തി.

2 പേരെയും കസ്റ്റഡിയിലെടുത്തപ്പോള്‍ ഇവരുടെ ഫോണിലേക്ക് മറ്റൊരാളുടെ വിളിയെത്തി. എവിടാണ് എന്നായിരുന്നു ചോദ്യം. ഫോണ്‍നമ്പരുമായി ബന്ധപ്പെട്ട് ഇവരെ ചോദ്യം ചെയ്തപ്പോള്‍ ഇവര്‍ക്കു മുന്‍പേഅതിര്‍ത്തി കടന്നവരാണ് ഫോണില്‍ വിളിച്ചതെന്ന് പോലീസ് മനസിലാക്കി. സൈബര്‍ സെല്‍ മുഖാന്തിരം നമ്പര്‍ ട്രേസ് ചെയ്തു. കമ്പംമെട്ട് ഏട്ടേക്കര്‍ക്കാനത്ത് മൊബൈല്‍ഫോണ്‍ ലൊക്കേഷന്‍ കാണിച്ചു. ഇവിടെ പരിശോധന നടത്തിയപ്പോഴാണ് ആദര്‍ശിനെയും സബിറിനെയും ഒരു കിലോ കഞ്ചാവുമായി പിടികൂടിയത്. കേസില്‍ നാല് പേരും സഞ്ചരിച്ചിരുന്ന രണ്ട് ബൈക്കും കസ്റ്റഡിയിലെടുത്തു.

ഉടുമ്പന്‍ചോല എല്‍എ തഹസില്‍ദാര്‍ കെ.എസ്. ജോസഫിന്റെ സാന്നിധ്യത്തില്‍ കഞ്ചാവ് അളന്ന് തിട്ടപ്പെടുത്തി മഹസര്‍ തയ്യാറാക്കി. കമ്പംമെട്ട് സിഐ ജി. സുനില്‍കുമാര്‍, എസ്‌ഐ ചാക്കോ, ഉദ്യോഗസ്ഥരായ സുലേഖ, മധു, ഹരിദാസ്, ജയേഷ്, ആര്‍. ബിനുമോന്‍, രാജേഷ്, ശ്രീജു, രാജേഷ്‌മോന്‍, ഷമീര്‍, റെക്‌സ്, എക്‌സൈസ് ഉദ്യോഗസ്ഥരായ സി.ആര്‍. സതീഷ്, സിറിള്‍ ജോസഫ്, ഷോബിന്‍ മാത്യു, സെയില്‍സ് ടാക്‌സ് ഡ്രൈവര്‍ ജിജോ മാത്യു എന്നിവര്‍ ചേര്‍ന്നാണ് കഞ്ചാവ് കടത്ത് സംഘത്തെ കുടുക്കിയത്.പ്രതികളെ കോടതിയില്‍ ഹാജരാക്കി.