പോളിങ് സമയം ആരംഭിക്കുന്നതിന് മുമ്പേ എ.സി. മൊയ്തീന്റെ വോട്ട് ചെയ്യല്‍; പരാതി ലഭിച്ചാല്‍ അന്വേഷിക്കുമെന്ന് തെരഞ്ഞെടുപ്പ് കമ്മീഷന്‍

തൃശൂര്‍ : പോളിങ് സമയത്തിന് മുമ്പേ മന്ത്രി എ.സി. മൊയതീന്‍ വോട്ട് രേഖപ്പെടുത്തിയ സംഭവത്തില്‍ പരാതി ലഭിച്ചാല്‍ അന്വേഷിക്കുമെന്ന് സംസ്ഥാന തെരഞ്ഞെടുപ്പ് കമ്മിഷണര്‍ വി. ഭാസ്‌കര്‍. തൃശൂര്‍ തെക്കുംകര പനങ്ങാട്ടുകരയിലെ പോളിങ് ബൂത്തിലാണ് വോട്ടിങ് സമയത്തിന് മുമ്പേ മന്ത്രി വോട്ട് രേഖപ്പെടുത്താനായി എത്തിയത്.  

തെരഞ്ഞെടുപ്പ് സമയങ്ങളില്‍ തന്റെ ബൂത്തിലെ ആദ്യ വോട്ടറായി മന്ത്രി മാറാറുണ്ട്. ഇത്തവണയും ആ പതിവ് തെറ്റിക്കാതെ എത്തിയാണ് അദ്ദേഹം. രാവിലെ 6.40 ന് മന്ത്രി ബൂത്തിലെത്തി ക്യൂ നിന്നു. വരിയിലെ ഒന്നാമനും മന്ത്രിയായിരുന്നു. ഒരുക്കങ്ങള്‍ പൂര്‍ത്തിയായ ശേഷം പോളിങ് ഉദ്യോഗസ്ഥര്‍ മന്ത്രിയോട് വോട്ട് രേഖപ്പെടുത്താന്‍ ആവശ്യപ്പെട്ടു. മന്ത്രി ബൂത്തില്‍ കയറി വോട്ട് രേഖപ്പെടുത്തുകയും ചെയ്തു. എന്നാല്‍ പോളിങ് സമയം ആരംഭിക്കുന്നതിന് മുമ്പായി 6.55ന് തന്നെ അദ്ദേഹം വോട്ട് രേഖപ്പെടുത്തുകയായിരുന്നു.  

പിന്നീട് മന്ത്രി ബൂത്ത് വിട്ട പോയ ശേഷം ഇക്കാര്യം വാര്‍ത്തയായതോടെ വടക്കാഞ്ചേരി എംഎല്‍എ അനില്‍ അക്കര മന്ത്രിക്കെതിരെ രംഗത്തെത്തി. മന്ത്രി മൊയ്തീനെതിരെ നടപടി സ്വീകരിക്കണമെന്ന് ആവശ്യപ്പെടുകയായിരുന്നു. 6.55നാണ് പഞ്ചായത്ത് വകുപ്പ് മന്ത്രി തെക്കുംകര കല്ലമ്പാറ ബൂത്തില്‍ വോട്ട് ചെയ്തത്. തെരഞ്ഞെടുപ്പ് കമ്മീഷന്‍ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.