കൊച്ചി: രാജീവ് ഗാന്ധി സെന്റര്‍ ഫോര്‍ ബയോ ടെക്‌നോളജിയുടെ പുതിയ ക്യാമ്പസിന് ഗുരുജി ഗോള്‍വല്‍ക്കറുടെ പേര് നല്‍കിയതിനെ വിജ്ഞാന്‍ ഭാരതി സ്വാഗതം ചെയ്തു. ഗവേഷണ സ്ഥാപനങ്ങളെ സങ്കുചിത രാഷ്ട്രീയ ലക്ഷ്യങ്ങള്‍ക്കുവേണ്ടി വിവാദങ്ങളിലേക്ക് വലിച്ചിഴയ്ക്കരുത്. സ്ഥാപനങ്ങളുടെ പേര് നിര്‍ണയിക്കുന്നതിന് നിശ്ചിത നയരേഖകളൊന്നുമില്ല. ഈ സാഹചര്യത്തില്‍ ചില വ്യക്തികളുടെ സാമൂഹിക- രാഷ്ട്രീയ വീക്ഷണവുമായി യോജിക്കാത്തവരെ ഇകഴ്‌ത്തികാട്ടാനുള്ള ശ്രമം ജനാധിപത്യ വിരുദ്ധമാണ്.
ദശാബ്ദങ്ങളോളം ദേശീയ പ്രസ്ഥാനങ്ങളെ നയിക്കുകയും കോടിക്കണക്കിനു ഭാരതീയരുടെ സ്‌നേഹാദരങ്ങള്‍ പിടിച്ചുപറ്റുകയും ചെയ്ത ദാര്‍ശനികനായ ഗുരുജി ഗോള്‍വല്‍ക്കറുടെ പേര് ഇപ്പോള്‍ സ്ഥാപിക്കുന്ന നാഷണല്‍ സെന്റര്‍ ഫോര്‍ കോംപ്ലക്‌സ് ഡീസീസ് ആന്‍ഡ് വൈറല്‍ ഇന്‍ഫെക്ഷന്റെ കാര്യപദ്ധതികള്‍ക്ക് വേണ്ട പ്രചോദനം നല്‍കും. ബനാറസ് ഹിന്ദു സര്‍വകലാശാലയിലെ ജന്തുശാസ്ത്ര അധ്യാപകനും കൂടിയായിരുന്നു ഗുരുജി ഗോള്‍വല്‍ക്കര്‍. ഭാരതത്തിന്റെ സാമൂഹിക സാംസ്‌കാരിക മണ്ഡലങ്ങളെ രൂപപ്പെടുത്തുന്നതിലും വരും കാലങ്ങളില്‍ അതിനെ സ്വാധീനിക്കുന്നതിലും ശാസ്ത്ര വിദ്യാര്‍ത്ഥിയും, അധ്യാപകനും, ഗവേഷകനും ആയിരുന്ന ഗുരുജി ഗോള്‍വല്‍ക്കറുടെ ശാസ്ത്രീയമായ സമീപനത്തിലൂടെയുള്ള ഉള്‍ക്കാഴ്ചകള്‍ വളരെയധികം സ്വാധീനം ചെലുത്തിയിട്ടുണ്ട്. ഭാരതത്തിലെ നിരവധി സ്ഥാപനങ്ങള്‍ രാഷ്ട്രീയ സാമൂഹിക, സാംസ്‌കാരിക, ശാസ്ത്ര സാങ്കേതിക രംഗത്തെ വ്യക്തിത്വങ്ങളുടെ പേരില്‍ അറിയപ്പെടുന്നുണ്ട്.
പ്രതികരിക്കാൻ ഇവിടെ എഴുതുക: