അഞ്ചല്: സുഹൃത്തുക്കളായ പെണ്കുട്ടികള് വൈക്കത്ത് ആത്മഹത്യ ചെയ്തത് പിരിയേണ്ടി വരുമെന്ന ആശങ്കയെ തുടര്ന്നെന്ന് സൂചന. ആയൂര് സ്വദേശിനികളായ അമൃതയും ആര്യ ജി. അശോക് കുമാണ് വൈക്കത്ത് ആത്മഹത്യ ചെയ്തത്. ഇരുവരും 14ന് രാത്രി ഏഴരയോടെയാണ് വൈക്കം മുറിഞ്ഞപുഴ പാലത്തില് നിന്ന് മൂവാറ്റുപുഴ ആറ്റിലേക്ക് ചാടിയത്. കഴിഞ്ഞ ദിവസം രാവിലെയോടെയാണ് ഇരുവരുടെയും മൃതദേഹം കണ്ടെത്തിയത്.
21 വയസുള്ള അമൃതയും ആര്യയും കൊല്ലത്തെ സ്വകാര്യ വിദ്യാഭ്യാസ സ്ഥാപനത്തില് അവസാനവര്ഷ ബിരുദ വിദ്യാര്ഥിനികളായിരുന്നു. പഠനകാലത്ത മുഴുവന് സമയവും ഇവര് ഒന്നിച്ചാണ് ചെലവഴിച്ചിരുന്നത്. ശനിയാഴ്ച രാവിലെ ഡിഗ്രി സര്ട്ടിഫിക്കറ്റ് വാങ്ങാനെന്ന പേരിലാണ് ഇരുവരും പുറപ്പെട്ടത്. എന്നാല് വൈകുന്നേരമായിട്ടും മടങ്ങിയെത്താതെ വന്നതോടെ മാതാപിതാക്കള് ചടയമംഗലം പോലീസില് പരാതി നല്കുകയായിരുന്നു. വൈക്കത്തു നിന്നും ലഭിച്ച ചെരുപ്പും തൂവാലയും ബന്ധുക്കള് തിരിച്ചറിഞ്ഞതോടെ ആറ്റില് ചാടിയത് അമൃതയും ആര്യയുമാണെന്ന് പോലീസ് ഉറപ്പിക്കുകയായിരുന്നു.
തിരച്ചില് തുടരുന്നതിനിടെ പൂച്ചാക്കലില് ഇന്നലെ രാവിലെ തീരത്തോട് ചേര്ന്ന് ആദ്യം അമൃതയുടെ മൃതദേഹവും പെരുമ്പളം സൗത്തില് നിന്ന് ആര്യയുടെ മൃതദേഹവും കണ്ടെത്തി. പിരിയാനാകാത്ത വിധം തീവ്രസൗഹൃദത്തിലായിരുന്നു ഇരുവരുമെന്നാണ് പോലീസിന് ലഭിച്ച വിവരം. മിക്ക സമയത്തും ഒരുമിച്ചായിരുന്നു ഇരുവരും. ഇരുവരും പരസ്പരം വീടുകളില് പോയി താമസിക്കുകയും ചെയ്തിരുന്നു. വിദേശത്തു ജോലി ചെയ്തിരുന്ന അമൃതയുടെ പിതാവ് അടുത്തിടെ വിദേശത്തുനിന്നും വന്നിരുന്നു. പിതാവ് ക്വാറന്റൈനില് കഴിഞ്ഞിരുന്ന ദിവസങ്ങളില് അമൃത ആര്യയുടെ വീട്ടിലായിരുന്നു താമസിച്ചിരുന്നത്.
ക്വാറന്റൈന് കാലാവധി കഴിഞ്ഞതോടെ അമൃതയുടെ മാതാപിതാക്കള് വിവാഹാലോചനയുമായി മുന്നോട്ടുപോവുകയും വിവാഹം നിശ്ചയിക്കുകയുമായിരുന്നു. ഇതേത്തുടര്ന്ന് കടുത്ത മാനസിക സമ്മര്ദ്ദത്തിലായിരുന്നു ഇരുവരുമെന്ന് വിവരം ലഭിച്ചിരുന്നതായി പോലീസ് പറയുന്നു. ഇതിനുശേഷമാണ് ആരോടും പറയാതെ ഇരുവരും വൈക്കത്തേക്ക് പോന്നത്. ഇരുവരെയും കാണാതായശേഷം നടത്തിയ അന്വേഷണത്തില് ആര്യയുടെ ഫോണ് തിരുവല്ലയിലെ ലൊക്കേഷനില് ഉള്ളതായി പോലീസ് കണ്ടെത്തിയിരുന്നു. എന്നാല് പിന്നീട് ഫോണ് സ്വിച്ച് ഓഫായി. പിന്നീട് ഇരുവരും പാലത്തില് നിന്നും ചാടിയ വിവരമാണ് പുറത്തുവന്നത്.
ശനിയാഴ്ച വൈകിട്ട് പാലത്തിനു സമീപം രണ്ടു യുവതികളെ സംശയാസ്പദമായ സാഹചര്യത്തില് കണ്ടെത്തിയതായി മുറിഞ്ഞപുഴയിലെ ആട്ടോ ഡ്രൈവര്മാര് പോലീസിനോട് പറഞ്ഞിരുന്നു. ഇരുവരും പാലത്തില് നിന്ന് ഒരുമിച്ച് നിന്ന് ഫോട്ടോയെടുത്തിരുന്നു. പാലത്തിന്റെ വടക്കുഭാഗത്തുനിന്ന് നടന്നുവന്ന പെണ്കുട്ടികള് പാലത്തില് നിന്നും ആറ്റിലേക്ക് ചാടുന്നതായി കണ്ടുവെന്ന് പുഴയ്ക്ക് സമീപം താമസിക്കുന്ന വീട്ടിലെ കുട്ടികള് മാതാപിതാക്കളോട് പറഞ്ഞിരുന്നു.
തുടര്ന്ന് പോലീസ് നടത്തിയ പരിശോധനയില് പാലത്തില് നിന്ന് തൂവാലയും ചെരുപ്പുകളും കണ്ടെത്തുകയായിരുന്നു. ഫയര്ഫോഴ്സും പൊലീസും ചേര്ന്ന് രണ്ടു ദിവസമായി തിരച്ചില് നടത്തിവരികയായിരുന്നു. വൈക്കം പോലീസ് മേല്നടപടി സ്വീകരിച്ചുവരുന്നു.
ജന്മഭൂമി ഓണ്ലൈന്