കുമളി: സുഹൃത്തിന്റെ വീടിനുള്ളില് അന്പത്തിയഞ്ചുകാരനെ മരിച്ച നിലയില് കണ്ടെത്തിയത് സംഭവം കൊലപാതകം. മദ്യലഹരിയിലെ വാക്കേറ്റം കൊലയില് കലാശിച്ചു, ദമ്പതികള് പോലീസ് പിടിയില്.
കുമളി ഒന്നാം മൈല് സ്വദേശിയായ സജീവനെ(55) യാണ് സുഹൃത്തായ ബാലകൃഷ്ണന്റെ വീടിനുള്ളില് ദീപാവലി ദിവസം മരിച്ച നിലയില് കണ്ടെത്തിയത്. കേസില് ഇയാള്ക്ക് പുറമെ ഭാര്യ ശാന്തിയേയും കുമളി പോലീസ് അറസ്റ്റ് ചെയ്തു.
കഴിഞ്ഞ ദിവസം ചക്കുപള്ളത്ത് തോട്ടം പണിക്കായി എത്തിയതോടെയാണ് സജീവനും ബാലകൃഷ്ണനും പരിചയപ്പെട്ടതും സുഹൃത്തുക്കളായതും. ദീപാവലി ആഘോഷിക്കാന് ബാലകൃഷ്ണന് സജീവനെ വീട്ടിലേയ്ക്ക് ക്ഷണിച്ചു. വെള്ളിയാഴ്ച വൈകീട്ട് ഇരുവരും ബൈക്കില് പുറത്തേയ്ക്ക് പോകുന്നത് നാട്ടുകാര് കണ്ടിരുന്നു, രാത്രിയോടെയാണ് ഇരുവരും തിരിച്ചെത്തിയത്. മദ്യലഹരിയില് ഇരുവരും തമ്മില് വാക്കേറ്റമുണ്ടായി. എന്നാല് ഇവര് പുലര്ച്ചെ തന്നെ നാട്ടുകാരെ വിളിച്ചുണര്ത്തി സജീവന് ഉണരുന്നില്ലെന്നും ഹൃദയാഘാതമാണോയെന്ന് സംശയമുണ്ടെന്നും പറഞ്ഞു.
സംശയം തോന്നിയ നാട്ടുകാര് പോലീസില് അറിയിച്ചു. പോലീസെത്തി നടത്തിയ പ്രാഥമിക പരിശോധനയില് സജീവന്റെ കഴുത്തില് വലിയ മുറിപ്പാട് കണ്ടെത്തി. സമീപത്തുണ്ടായിരുന്ന സാരി പിരിച്ച നിലയില് കണ്ടതോടെ പോലീസ് കൊലപാതകമാകമെന്ന പ്രാഥമിക നിഗമനത്തിലെത്തുകയായിരുന്നു. ഇന്നലെ കോട്ടയം മെഡിക്കല് കോളേജില് നടത്തിയ പോസ്റ്റുമോര്ട്ടത്തില് കഴുത്ത് ഞെരിച്ചാണ് കൊലയെന്ന് തെളിഞ്ഞു.
ഏറ്റുവാങ്ങാന് ആളെത്താത്തതിനാല് മൃതദേഹം ആശുപത്രി മോര്ച്ചറിയില് സൂക്ഷിച്ചിരിക്കുകയാണ്. കുമളി സിഐ ജോബിന് ആന്റണി, എസ്ഐ പ്രശാന്ത് പി. നായര് എന്നിവരടങ്ങുന്ന സംഘമാണ് പ്രതികളെ അറസ്റ്റ് ചെയ്തത്. പ്രതികളെ തെളിവെടുപ്പിന് ശേഷം കോടതിയില് ഹാജരാക്കി റിമാന്ഡ് ചെയ്തു.
ജന്മഭൂമി ഓണ്ലൈന്