ബെംഗളൂരു : മയക്കുമരുന്ന് കേസില്‍ എന്‍ഫോഴ്‌സ്‌മെന്റ് ചോദ്യം ചെയ്യലിനിടെ ബിനീഷ് കോടിയേരിക്ക് ദേഹാസ്വാസ്ഥ്യം. കേസില്‍ കഴിഞ്ഞ ദിവസം അറസ്റ്റ് ചെയ്ത് കോടതിയില്‍ ഹാജരാക്കിയിരുന്നു. വിശദമായ ചോദ്യം ചെയ്യലിനായി കോടതി എന്‍ഫോഴ്‌സ്‌മെന്റ് കസ്റ്റഡിയില്‍ വിടുകയും ചെയ്തിരുന്നു.
എന്‍ഫോഴ്‌സ്‌മെന്റ് അധികൃതര്‍ ഇന്ന് വീണ്ടും ചോദ്യം ചെയ്യുന്നതിനിടെ ബിനീഷ് ദേഹാസ്വാസ്ഥ്യം പ്രകടിപ്പിക്കുകയായിരുന്നു. നടുവ് വേദനയാണെന്നാണ് വിവരം. അന്വേഷണ സംഘം ബീനീഷിനെ ആശുപത്രിയിയിലേക്ക് മാറ്റി. തുടര്‍ച്ചയായി ഇന്നും ചോദ്യം ചെയ്യുന്നതിനിടെയാണ് ഇത്തരത്തില്‍ ഉണ്ടായിരിക്കുന്നത്. നാല് ദിവസത്തേയ്‌ക്കാണ് ബിനീഷിനെ കസ്റ്റഡിയില്‍ വിട്ടിരിക്കുന്നത്.
മയക്കുമരുന്ന് കേസില്‍ ബിനീഷിനെതിരെ എന്‍സിബിയും കേസെടുക്കാനുള്ള നടപടികള്‍ ആരംഭിച്ചിരിക്കുകയാണ്. ഇതിന്റെ ഭാഗമായി ശനിയാഴ്ച ബെംഗളുരു എന്‍ഫോഴ്‌സ്‌മെന്റ് ഓഫീസിലെത്തി ബിനീഷിന്റെ മൊഴിയുടെ പകര്‍പ്പുകള്‍ കൈപ്പറ്റിയിരുന്നു. ഇത് കൂടാതെ ചോദ്യം ചെയ്യലിന് കസ്റ്റഡിയില്‍ വിട്ട് കിട്ടുന്നതിനായി അപേക്ഷ സമര്‍പ്പിക്കാന്‍ ഇരിക്കുകയായിരുന്നു.
അതേസമയം എന്‍ഫോഴ്‌സ്‌മെന്റ് ഉദ്യോഗസ്ഥരുടെ ചോദ്യം ചെയ്യലിനോട് ബിനീഷ് കൊടിയേരി സഹകരിക്കുന്നില്ലെന്നും ആരോപണമുണ്ട്. പണമിടപാടിനെ കുറിച്ചുള്ള വിവരങ്ങള്‍ വെളിപ്പെടുത്താന്‍ ബിനീഷ് തയ്യാറാവുന്നില്ല മറുപടി നല്‍കാതെ ഒഴിഞ്ഞുമാറുകയാണ്. ഇതിനെ തുടര്‍ന്ന് രണ്ടാം ദിവസത്തെ ചോദ്യം ചെയ്യല്‍ എട്ട് മണിയോടെ അവസാനിച്ചെന്നും എന്‍ഫോഴ്‌സ്‌മെന്റ് അറിയിച്ചിരുന്നു.
പ്രതികരിക്കാൻ ഇവിടെ എഴുതുക: