സുരേഷ് ഗോപി നായകനാവുന്ന ഒറ്റക്കൊമ്പന്റെ ടീസര് പുറത്തിറങ്ങി മണിക്കൂറുകള്ക്കുള്ളില് തന്നെ യൂട്യൂബില് ട്രെന്ഡിങ്. സുരേഷ് ഗോപിയുടെ 250ാമത്തെ ചിത്രം കൂടിയായ ഒറ്റക്കൊമ്പന് കരിയറില് ഇതുവരെ ഉള്ളതില് ഏറ്റവും വലിയ ചിത്രം കൂടിയാണെന്നാണ് വിശേഷിപ്പിക്കുന്നത്.
പേരുപോലെ തന്നെ കാടിളക്കി മദിച്ചുവരുന്ന ആനയുടെ പ്രതീതി ഉയര്ത്തിക്കൊണ്ടാണ് ചിത്രത്തിന്റെ ടൈറ്റില് പുറത്തിറക്കിയത്. മുളകുപാടം ഫിലിംസിന്റെ ബാനറില് ടോമിച്ചന് മുളകുപാടം നിര്മിക്കുന്ന ചിത്രം സംവിധാനം ചെയ്യുന്നത് നവാഗതനായ മാത്യു തോമസാണ്. ഷിബിന് തോമസാണ് കഥയും തിരക്കഥയും രചിച്ചിരിക്കുന്നത്. അര്ജുന് റെഡ്ഡിയിലൂടെ ശ്രദ്ധേയനായ ഹര്ഷവര്ധന് രാമേശ്വറാണ് സംഗീത സംവിധാനം. ഷാജികുമാര് ഛായാഗ്രഹണം നിര്വഹിക്കുന്നു.
തിരക്കഥയുടെ പകര്പ്പവകാശവുമായി ബന്ധപ്പെട്ട് ഒറ്റക്കൊമ്പനും പൃഥ്വിരാജിന്റെ കടുവയും വാര്ത്തകളില് ഇടംപിടിച്ചിരുന്നു. പിന്നാലെ തിരക്കഥയുമായി മുന്നോട്ടുപോകുമെന്ന് സുരേഷ് ഗോപിയും അറിയിച്ചിരുന്നു. ഇതിന് പിന്നാലെയാണ് ടൈറ്റില് റിലീസ് നടന്നത്. മമ്മൂട്ടി, മോഹന്ലാല്, ദുല്ഖര്, കുഞ്ചാക്കോ ബോബന് ഉള്പ്പടെ നിരവധി താരങ്ങളാണ് ചിത്രത്തിന്റെ ടൈറ്റില് പ്രഖ്യാപനം നടത്തിയത്. ചിത്രം പുറത്തുവരാനുള്ള കാത്തിരിപ്പിലാണ് ആരാധകര്.
