നെടുങ്കണ്ടം: ജിയോളജി വകുപ്പിന്റെ പാസില്ലാതെ മെറ്റലുമായെത്തിയ 5 ടോറസ് ലോറികള് ഉടുമ്പന്ചോല തഹസില്ദാര് പിടികൂടി. ഇന്നലെ രാവിലെ 9.30ന് നെടുങ്കണ്ടം ടൗണില് നിന്നുമാണ് വാഹനങ്ങള് പിടികൂടിയത്.
കോതമംഗലത്ത് നിന്ന് നെടുങ്കണ്ടം താലൂക്കാശുപത്രിയിലേക്ക് മെറ്റലുമായി എത്തിയതാണ് ലോറികള്. വാഹനത്തിലെ ജീവനക്കാര് ചായ കുടിക്കാനായി നെടുങ്കണ്ടം ടൗണില് വാഹനങ്ങള് നിര്ത്തിയിട്ടു. പരാതിയെ തുടര്ന്നാണ് തഹസില്ദാര് പരിശോധന നടത്താനായി എത്തിയത്.
പിടിച്ചെടുത്ത ലോറികള് ഉടുമ്പന്ചോല മിനി സിവില് സ്റ്റേഷന് കോപൗണ്ടിലേക്ക് മാറ്റി. വ്യാവസായി റോയി കുര്യന്റെ ഉടമസ്ഥതയിലുള്ളതാണ് ടോറസ് ലോറികള്. ദേവികുളം സബ് കളക്ടര്ക്ക് റിപ്പോര്ട്ട് നല്കിയ ശേഷം തുടര് നടപടി സ്വീകരിക്കുമെന്ന് ഉടുമ്പന്ചോല തഹസില്ദാര് അറിയിച്ചു.
