അഞ്ചാലുംമൂട്: തൃക്കരുവ ഇഞ്ചവിള വൃദ്ധസദനത്തില്‍ കൊറോണ പടരുന്നു. ജീവനക്കാര്‍ക്കും അന്തേവാസികള്‍ക്കുമായി 67 പേര്‍ക്ക് കൊറോണ സ്ഥിരീകരിച്ചു. രോഗം സ്ഥിരീകരിച്ചവരുടെ സമ്പര്‍ക്ക ഉറവിടം വ്യക്തമല്ലെന്നാണ് അധികൃതര്‍ പറയുന്നത്.
സൂപ്രണ്ട് അടക്കം എട്ടു ജീവനക്കാര്‍ക്കും 59 അന്തേവാസികള്‍ക്കുമാണ് രോഗം പിടിപ്പെട്ടത്. അന്തേവാസികളില്‍ 44 പുരുഷന്മാര്‍ക്കും 15 സ്ത്രീകള്‍ക്കുമാണ് രോഗം സ്ഥിരീകരിച്ചത്. ഇവരില്‍ മൂന്നുപേരെ പാരിപ്പള്ളി മെഡിക്കല്‍ കോളേജില്‍ പ്രവേശിപ്പിച്ചു. 35 പേരെ എസ്എന്‍ കോളേജിലും 21 പേരെ ഹോക്കിസ്റ്റേഡിയത്തിലെ ഫസ്റ്റ് ലൈന്‍ ട്രീറ്റ്‌മെന്റ് സെന്ററിലേക്കും മാറ്റി.ഇവിടെ ആകെ 91 അന്തേവാസികളാണുള്ളത്. കൊറോണ വ്യാപനം മൂലം പുറത്തുനിന്നുള്ള ആരെയും വൃദ്ധസദനത്തില്‍ പ്രവേശിപ്പിച്ചിരുന്നില്ല. കര്‍ശന നിയന്ത്രണങ്ങളാണ് ഏര്‍പ്പെടുത്തിയിരുന്നത്.
മറ്റുള്ളവര്‍ക്ക് പരിശോധനയടക്കമുള്ള പ്രതിരോധ ചികിത്സാപ്രവര്‍ത്തനങ്ങള്‍ ശക്തമാക്കി. ഫയര്‍ഫോഴ്‌സ് സംഘം വൃദ്ധസദനം അണുവിമുക്തമാക്കി.
പ്രതികരിക്കാൻ ഇവിടെ എഴുതുക: