കൊച്ചി : സ്വര്ണക്കടത്ത് കേസില് മുന്കൂര് ജാമ്യ ഹര്ജിയുമായി മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി ഹൈക്കോടതിയില്. എന്ഫോഴ്സ്മെന്റ് രജിസ്റ്റര് ചെയ്ത കേസിലാണ് മുന്കൂര് ജാമ്യ ഹര്ജി നല്കിയത്.
കഴിഞ്ഞ ദിവസം ശിവശങ്കര് കൊച്ചിയില് ഹൈക്കോടതി അഭിഭാഷകനെ സന്ദര്ശിച്ച് നിയമോപദേശം തേടിയിരുന്നു. സ്വര്ണ്ണക്കടത്ത് കേസുമായി ബന്ധപ്പെട്ട് അറസ്റ്റ് തടയുന്നത് അടക്കമുള്ള കാര്യങ്ങളില് നിയമോപദേശം തേടുന്നതിനാണ് അഭിഭാഷകനെ കാണാന് ശിവശങ്കര് എത്തിയത്.
ഇതുമായി ബന്ധപ്പെട്ട് ശിവശങ്കറിനെ എന്ഫോഴ്സ്മെന്റ് ഇന്ന് ചോദ്യം ചെയ്യാനിരിക്കേയാണ് മുന്കൂര് ജാമ്യഹര്ജി നല്കിയിരിക്കുന്നത്. വിദേശ യാത്രകളുമായി ബന്ധപ്പെട്ടാണ് ശിവശങ്കറിനെ ഇന്ന് ചോദ്യം ചെയ്യുന്നത്. 2016 മുതലുള്ള യാത്രാ രേഖകള് ഹാജരാക്കാനും എന്ഫോഴ്സ്മെന്റ് ആവശ്യപ്പെട്ടിട്ടുണ്ട്.
സ്വപ്നയുമായി ശിവശങ്കറിന് സാമ്പത്തിക ഇടപാടുകള് ഉണ്ടായിരുന്നതായി അന്വേഷണത്തില് കണ്ടെത്തിയിട്ടുണ്ട്. സ്വപ്നയ്ക്കൊപ്പം ഇയാള് വിദേശ യാത്രകളും നടത്തിയിട്ടുണ്ട്. ഇതിന്റെ അടിസ്ഥാനത്തിലാണ് യാത്രാ രേഖകള് ഹാജരാക്കാന് ആവശ്യപ്പെട്ടിരിക്കുന്നത്.
കഴിഞ്ഞ ആഴ്ചയില് തുടര്ച്ചയായി രണ്ട് ദിവസം കസ്റ്റംസ് ശിവശങ്കറിനെ കൊച്ചിയില് വിളിച്ചുവരുത്തി ചോദ്യം ചെയ്തിരുന്നു. ചൊവ്വാഴ്ച വീണ്ടം ചോദ്യം ചെയ്യുമെന്ന് അറിയിച്ചെങ്കിലും പിന്നീട് പാസ്പോര്ട്ടും യാത്രാ രേഖകളും ഹാജരാക്കിയാല് മതിയെന്ന് അറിയിക്കുകയായിരുന്നു.
ശിവശങ്കറിനെ ചോദ്യം ചെയ്യുന്ന അതേസമയം തന്നെ സ്വര്ണക്കടത്ത് കേസിലെ പ്രതികളായ സ്വപ്ന, സരിത്ത്, സന്ദീപ് എന്നിവരേയും കാക്കനാട് വിയ്യൂര് ജയിലുകളില് വെച്ച് ചോദ്യം ചെയ്തു. കസ്റ്റംസ് കമ്മിഷണറുടെ നേതൃത്വത്തിലായിരുന്നു ചോദ്യം ചെയ്യല്.
