കാസര്‍കോട്: കൊവിഡ് രോഗവ്യാപനം രൂക്ഷമാകുന്ന സാഹചര്യത്തില്‍ പ്രതിരോധ പ്രവര്‍ത്തനങ്ങള്‍ സമൂഹത്തിന്റെ ഏറ്റവും അടിത്തട്ടില്‍ അക്ഷരാര്‍ഥത്തില്‍ നടപ്പാക്കുന്നുവെന്ന് ഉറപ്പ് വരുത്തുന്നത്തിനായി ജില്ലയില്‍ 51 ഗസറ്റഡ് ഓഫീസര്‍മാരെ സെക്ടറല്‍ മജിസ്ട്രേറ്റുമാരായി നിയോഗിച്ചതായി ജില്ലാ കളക്ടര്‍ ഡോ.ഡി.സജിത് ബാബു അറിയിച്ചു. ഗസറ്റഡ് റാങ്കിലുള്ള ഹയര്‍ സെക്കണ്ടറി അധ്യാപകരെയാണ് നിയമിച്ചിരിക്കുന്നത്. ഇവര്‍ ഇന്ന് രാവിലെ മുതല്‍ ഡ്യൂട്ടിയില്‍ പ്രവേശിക്കേണ്ടതാണ്.
കടകളും സ്ഥാപനങ്ങളും ഉള്‍പ്പെടെ ജനങ്ങള്‍ കൂട്ടംകൂടുന്ന സ്ഥലങ്ങളില്‍ നിയന്ത്രണങ്ങളും നിര്‍ദ്ദേശങ്ങളും നടപ്പിലാക്കേണ്ടതിന്റെ ഉത്തരവാദിത്തം സെക്ടറല്‍ മജിസ്ട്രേറ്റുമാര്‍ക്കാണ്. അവര്‍ക്ക് ക്രിമിനല്‍ നടപടിച്ചട്ട പ്രകാരം എക്സിക്യൂട്ടീവ് മജിസ്ട്രേറ്റുമാരുടെ അധികാരങ്ങള്‍ നല്‍കിയിട്ടുണ്ട്. നിയമന ലംഘനം കണ്ടെത്തിയാല്‍ ഇവര്‍ സ്വീകരിക്കുന്ന നടപടികള്‍ ക്രിമിനല്‍ നടപടി ചട്ടപ്രകാരമുള്ളതായിരിക്കും.
സെക്ടറല്‍ മജിസ്ട്രേറ്റുമാര്‍ തങ്ങളുടെ ഉത്തരവാദിത്തം നിര്‍വ്വഹിക്കുന്നതിന്റെ ഭാഗമായി കടകളും സ്ഥാപനങ്ങളും സന്ദര്‍ശിക്കുമ്പോള്‍ ഒരു പോലീസ് ഉദ്യോഗസ്ഥന്‍ അദ്ദേഹത്തെ സഹായിക്കാനായി ഒപ്പം ഉണ്ടാകണമെന്ന് നിര്‍ദ്ദേശിച്ചിട്ടുണ്ട്.
അതത് സ്റ്റേഷന്‍ ഹൗസ് ഓഫീസര്‍മാര്‍ അത് ഉറപ്പാക്കും. ഈ ഉദ്യോഗസ്ഥര്‍ക്ക് സെക്ടര്‍ മജിസ്ടേട്ട് സ്റ്റിക്കര്‍ പതിച്ച വാഹനവും തിരിച്ചറിയല്‍ കാര്‍ഡും ഉടന്‍ ലഭ്യമാക്കും. എന്നാല്‍ വാഹനത്തിനും തിരിച്ചറിയല്‍ കാര്‍ഡിനുമായി കാത്തുനില്‍ക്കാതെ ഇന്ന് രാവിലെ തന്നെ പ്രവര്‍ത്തനങ്ങള്‍ ആരംഭിക്കേണ്ടതാണെന്ന് കളക്ടര്‍ അറിയിച്ചു. സെക്ടറല്‍ മജിസ്ട്രറ്റുമാര്‍ ജില്ലയില്‍ മാതൃകാപരമായി നടപ്പിലാക്കി വരുന്ന മാഷ് പദ്ധതിയുടെ ഭാഗമായി പ്രവര്‍ത്തിക്കേണ്ടതാണ്.
സെക്ടറല്‍ മജിസ്ട്രേറ്റുമാരെ ചുമതലപ്പെടുത്തിയിരിക്കുന്ന സ്ഥലത്ത് കുറഞ്ഞത് 20 സ്ഥലങ്ങള്‍ സന്ദര്‍ശിക്കണം. കാണുന്ന നിയമന ലംഘനങ്ങള്‍ സംബന്ധിച്ചും ലൊക്കേഷന്‍ ഡീറ്റെയില്‍സും 8590684023 എന്ന വാട്സ്ആപ് നമ്പറില്‍ ലഭ്യമാക്കണം. ഇവര്‍ ഡ്യൂട്ടി ആരംഭിക്കുന്നതും അവസാനിപ്പിക്കുന്നതും kasargod connect App ലിങ്ക് ചെയ്യണ്ടതാണ്. കൂടുതല്‍ വിവരങ്ങള്‍ക്ക് കളക്ടറേറ്റില്‍ ബന്ധപ്പെടണം. ഫോണ്‍ 7012032835.
പ്രതികരിക്കാൻ ഇവിടെ എഴുതുക: