കുന്ദമംഗലം: കാരന്തൂരില് ബൈക്കിലെത്തി സ്വര്ണാഭരണം തട്ടിപ്പറിച്ച കേസില് മൂന്ന് പേര് പിടിയില്. വേങ്ങര ഉദരകം വാരിയാടി ചെറുവിള പുത്തന്വീട്ടില് വി.സി. സാജിദ് (24), വേങ്ങര പുറ്റല്ലൂര് വാക്യത്തൊടി വീട്ടില് സല്മാന് ഫാരിസ് (23), വളാഞ്ചേരി ആദവനാട് അമ്പലപ്പറമ്പ് വെട്ടിക്കാട് പാരിക്കുഴിയില് വീട്ടില് ഷനൂബ് (32) എന്നിവരെയാണ് കുന്ദമംഗലം പോലീസ് അറസ്റ്റ് ചെയ്തത്. സാജിദും സല്മാനും മാവൂരിലെ പൊന്പറക്കുന്നില് നിന്നാണ് പിടിയിലായത്. ഇവിടെ ഒളിവില് കഴിയുകയായിരുന്നു. ഇവരില് നിന്നുള്ള വിവരത്തെ തുടര്ന്നാണ് ഷനൂബിനെ വയനാട്ടില് നിന്ന് പിടികൂടിയത്.
മോഷ്ടിച്ച സ്വര്ണ്ണം വില്ക്കാനുള്ള ശ്രമത്തിലായിരുന്നു ഇയാള്. പ്രതികള് സഞ്ചരിച്ച ഡ്യൂക് ബൈക്കും പൊലീസ് കസ്റ്റഡിയിലെടുത്തു. ഏഴിടങ്ങളില് വീട് കുത്തിതുറന്ന് മോഷണം നടത്തിയ കേസിലും പ്രതികളാണിവര്. മെഡിക്കല് കോളേജ് പോലീസ് സ്റ്റേഷന് പരിധിയില് രണ്ടാഴ്ച മുമ്പ് തട്ടിപ്പറി നടത്തിയതും ഇവരാണ്. ആഴ്ചകള്ക്ക് മുമ്പാണ് കാരന്തൂരില് ബൈക്കിലെത്തിയ സംഘം സ്ത്രീയുടെ രണ്ടര പവന് മാല കവര്ന്നത്. കുന്ദമംഗലം എസ്ഐ ശ്രീജിത്തിന്റെ നേതൃത്വത്തിലായിരുന്നു അന്വേഷണവും അറസ്റ്റും. പ്രതികളെ കോവിഡ് പരിശോധനക്ക് വിധേയമാക്കി കോടതിയില് ഹാജരാക്കി.
